Ilulissani atuartut angerlarsimaffittaavat ammaanersiortoq
Ilulissani atuartut angerlarsimaffiat nutaaq ullumi ammaanersiorneqarpoq. Illorsuaq 900 kvadratmeterisut angissusilik nutaalialluinnarpoq.
Tamanna atuartut angerlarsimaffianni pisortap tulluusimaarutigaa.
- Nuanneq tulluusimaarnaq. Ulloq ullorpassuit qilanaarisarput kiisami ulloq takkuppoq, Nivi K Amossen oqarpoq.
Ilulissat kommunerisimasaata nunaqarfiineersut tassa, Ilimanamit, Oqaatsunit Qeqertamit Saqqamiillu, meeqqat 21-t inissaqarput. Atuartut maanna 16-it nunaqarfitsik qimallugu meeqqat atuarfiat naammassiniarlugu illorsuarmi najugaqarput.
Aasialiartaraluartut
Ilulissani atuartunut ukiut kingullit arfinillit angerlarsimaffeqanngimmat, nunaqarfimmiut Aasialiartarput.
Saqqameersup, Inaluk Jensenip, 10 klassimi atuartup, ineeqqat tamarmik immikkut uffarfeqarlutillu perusuersartarfeqarnerat iluareqaa.
- Aasianninngaanniit ajunnginnerujussuuvoq. Aasianniinniukuulluni maanga pilluni luksuunerujussuuvoq. Immikkut uffarfeqarluni anartarfeqarluni inimilu kisimeeriaannaalluni, Inaluk Jensen oqarpoq.
Meeqqallumi tikinnerminniit tamanna nuannaarutigigaat pisortaq oqarpoq. Nivi K. Amossenimmi paasisaa malillugu Ilulissani atuartut angerlarsimaffigisimasaat ataatsimoorussamik uffarfeqarpoq.
Tupigusuttut
- Tikimmata ineerassaannut illorsuarlu kaajallatsillugu angalaarutillattaagatsigit, tupigusunnerat kiinaanni ersarippoq. Namminneq perusuersartarfeqarlutillu uffarfeqarniarlutik.
Nukappiaqqat niviarsiaqqallu illorsuarmi immikkut torsuusaqarput.
Illorsuaq iggaveqarpoq, nerisarfeqarpoq, errorsisarfeqerpoq ataatsimullu isersimaartarfeqarluni.
Meeqqat angerlarsimaffiat millioninik 25-nik akeqartoq, borgmesteri, Palle Jerimiassen oqalugiarnermini oqarpoq.
Qaaqqusat ammaanersiornermi sassaallerfigineqarput.
Assi: KNR