Ilisimatusartut ajugaaniunneranni corona sikkussarlu sammineqassasut

Ilisimatusarnerup ajornaatsumik paasiuminartumillu sammineqarluni Paasisavut novembarimi aaqqissuunneqarnissaanut ajugaaniuteqataasussat tallimat toqqarneqarput.

Allattoq Hanna Vestergaard Hviid

septembarip 18-at 2024 12:36

Nutserisoq Connie Fontain

Arctic Hubip ilisimatusartunut siullermeertumik siorna unammisitsivoq, ilisimatusartullu tassani ilisimasaminnik tiguartinnarnerpaamik paasiuminarnerpaamillu saqqummiussilluarnerpaaniupput.

Paasisavullu ukioq manna aaqqissuunneqarnissaanut unammeqataasussat tallimat maanna toqqarneqarput.

Arctic Hub tusagassiuutinut nalunaarummi allappoq.

Aamma atuarukPaasisavummi naliliisussat nassaarineqartut

Ilisimatusartut tallimat qinnuteqartut 21-t akornannit toqqarneqarput. Qinnuteqartut tamarmik ph.d-upput, nunatsinnilu ilisimatusarnermik suliaqartuullutik.

- Nuannaarutigeqaarput 21-t Paasisavut-mut peqataanissamut qinnuteqarsimammata. Naliliisartunit tusarpara ukioq manna qinnuteqaasiarineqartut torraaqisut. Taamaattumik aalajangiinissaq imaannaasimanngilaq, Arctic Hubip allattoqarfiani aqutsisoq, Jula Maegaard-Hoffmann, tusagassiuutinut nalunaarummi oqarpoq.

Piujuartitsineq, qalerallit aamma kulturikkut naapeqatigiinnerit

Ilisimatusartut assigiinngitsulluinnartunik tallimanik sammisaqarlutik ukioq manna unammissapput.

Kulturikkut naapeqatigiinnerit, COVID-19, sikkussaq, piujuartitsineq qalerallillu.

- Tulluusimaarutigaarput ukioq mannattaaq saqqummiussisartut piginnaaneqarluaqisut tallimat assigiinngeqisunik tallimanik ilisimatusaatigalugu suliniutillit ilisaritissinnaagatsigit. Aamma nunatsinni ilisimatusarfigineqartut assigiinngiiaarlutillu pingaaruteqassusiat toqqarneqartuni taakkunani erseqqissarneqarluarneqarsoraavut, Jula Maegaard Hoffmann oqarpoq.

Unammisassat tallimat aaku

Kirstine Eiby Møller inuit ilagiillu kristumiut assigiinngitsut naapeqatigiinnerat tamatumalu inuit inuiaqatigiittut inuunerminni atugaannut sunniutai pillugit ph.d.- nngorniuteqarpoq: ‘Nunasiaataanermi kulturikkut naapeqatigiinnerit’.
Mie Møller Kalaallit Nunaanni coronamik nappaalanersuaqarnerani suleriaaseq pillugu ph.d.-nngorniuteqarpoq: ’Kalaallit Nunaanni COVID-19-imik nappaalanersuaqarneranut isiginnittaatsit’.
Lokesh Jain sermersuup killingani sikkussat taakkualu silap pissusiata allanngoriartorneranut sunniutai pillugit ph.d.-nngorniuteqarpoq: ’Sikkussat serminik iigartartunik allanngoriartortitsinerannik takussutissiaq’.
Regine Møller Isertumi innuttaasut piujuartitsilluni ineriartortitsinermut isiginnittaasiat pillugu ph.d.-nngorniuteqarpoq: ’Piujuaannartitsisumik ineriartortitsineq: Nunasiaatillit periusiinik attassiinnarneq, nunasiaataajunnaarsarneq Iserdormiullu isiginnittaasiat’.
Natacha Severin ilaatigut Kalaallit Nunaanni qalerallit ’jelly fish’-imik taaneqartartumik sarajappallaartumik nerpeqalertarnerat pillugu ph.d.-nngorniuteqarpoq: ’Kalaallit Nunaanni qalerallit uumassusilittut allanngorarnerat – Piujuartitsinermik, pitsaassutsimik nioqquteqarnermilu nalingannik pitsanngorsaaneq (Qaleralik)’.

Allisiguk

Paasisavut Katuami novembarip 13-ianni aaqqissuunneqassaaq, unammeqataasullu tallimat ph.d-liaminnik minutsit tallimat atorlugit nassuiaassapput. Unamminermi Minik, Rosing, Nukâka Coster-Waldau aamma Rosannguaq Rossen ukioq manna ajugaasussamik naliliissapput.

Ilisimatusartoq ajornaannerpaamik tiguartinnarnerpaamillu saqqummiisinnaasoq 50.000 koruuninik aningaasartalimmik akissarsitinneqassaaq.

Paasisavut Katuami aaqqissuunneqarpat iserneq akeqassanngilaq, inissannillu maanna qulakkeerereersinnaavutit. Unammineq KNR-ikkut toqqaannartumik aamma aallakaatinneqassaaq.

Nutaarsiassami kukkunermik nassaarsimaguit uunga allaffigineqarsinnaavugut.