Ineqartut inissianik iluarsartuussinissamut akileeqataanissartik akuersaanngilluinnaraat
Inissiarsuit Namminersorlutik Oqartussanit pigineqartut iluarsartuunneqarnissaannik Naalakkersuisut pilersaaruteqarnerat ineqartut aqqusinermi naapitatta ilarpaaluisa ajoriffissaqartinngikkaluarpaat.
- Nillertarnermik massakkut, illup ilua silalu assigiilertaramik ukiukkut anorlertillugu, Tittus Siegstad oqarpoq.
Kisianni Namminersorlutik Oqartussat inissiaataannik iluarsartuussinissarsuarmi ineqartut katillugit 1,2 milliardit koruuninik akileeqataanissaannik Naalakkersuisut pilersaaruteqarnerat, aqqusinermi naapitatta akuerisinnaangilaat.
Inuuniarneq akisoreermat iluarsartuusineq piginnittut akilertariaqaraat naapitagut oqarput.
- Aningaasarsiakinnerpaatut inissisimasuulluni inissiat akisoreeramik, kisiannilu nutarterunik aamma akitsoqqittussat, misigisimavunga artukkerneqartussatut inissinneqartussanngussallunga, Benedikte Abelsen oqarpoq.
Ineqartulli ilaasa qaammammut akiliutigisartagaasa ineqartunut artukkiivallaannginnissaat qulakkeerniarlugu ineqarnermut tapi, tassa boligsikringi aaqqissuussiffigeqqinneqassasoq, ineqarnermut naalakkersuisup Hans Peter Poulsenip sapaatit akunnerata siuliani oqaatigaa.
Kisianni tassa taama pilersaartoqarnera ineqartunit iluarineqanngilaq.
Suut tamavimmik akitsoriartortut, oorersiagulli qaffakkiartunngitsut
- Akiligassat akilertarpagut, aamma pinngitsoornata nerisussaavugut. Suut tamavimmik akitsoriartorput. Oorersiagut qaffakkiartunngillat, malinnaatinneqanngillat utoqqaat oorersiaat, Lârsêrak Stephensen oqarpoq.
- Inimut tassunga akiliutigineqartartuniit, taakkunannga pinngitsoorani akilerneqartussaagaluarput, Lârsêrak Stephensen aamma oqarpoq.
Benedikte Abelsen isumaqataavoq.
- Depositumip atorneqarnerani isumaqarpunga uagut akileeqataareersugut tassuunaatigut, taanna oqarpoq.
Taanna ineqarnermut akiliutip 2027-miit ukiuni tulliuttuni arlalinni ukiumut 4 procentingajalluinnarnik qaffanneqartarneratigut aningaasaqarniarnikkut artukkerneqartussani kisiartaanngilaq.
Aningaasaqarniarnikkut pissualertussanut ilaallutik, Tittus Siegstad aamma oqarpoq.
- Akisoqaaq, nuliara siusinaartumik sulisinnaajunnaarnikuugami pisartagaqaraluarpoq, taanna oqarpoq.
Avaqqussinnaanngilarput
Ineqartulli akiliutigisartagaasa aamma qaffakkiartornissaat avaqqussinnaanngikkipput, ineqarnermut naalakkersuisup Hans Peter Poulsenip siusinnersukkut aamma oqaatigaa.
Tassa ineqartut inissiarsuit iluarsartuunneqarnissaannut 1,2 milliardit koruuninik akileeqataanissaat pilersaarutaavoq, nunattalu karsianut 1 milliardit koruuninik akeqassalluni.
Tassa ineqarnermut akiliut 2027-imiit ukiuni 15-ini ukiumut 3,8 procentinik qaffanneqartassaaq.
Ineqartulli akiligassaat 1,2 milliardit koruuniusut inissianik piginnittut namminneq akilertariaqaraluaraat, ineqartut isumaqarput.
- Tulluarsorinngilara taama pisoqalereernikuutigisut, nutaanik sanaartorunik akilersinnaanerussasoq isumaqarpunga, Esther Erngsen oqarpoq.
Naalakkersuisut akisussaaffitsik tigusariaqaraat, taanna oqarpoq.
Ineqarnermulli akiliutit qaffanneqartarnissaat isumatusaarnerusoq, Hans Peter Poulsen sapaatit akunnerata siuliani oqarpoq.
- Kingusinnerusukkut akilerneqassappat kinguaariit tulliisa akiligassarilissagamikku, taanna pinaveersaarniarlugu massakkuuvoq akiligassartaasa nalimmassarnissaat, taanna KNR-imut sisamanngormat oqarpoq.
Inissianik aappaagumiit iluarsartuussinissat 2044-mi naammassineqassangatinneqarput.
