Nuuk International Film Festivalimi nipangiutiinnartagaq pillugu filmiliaq takutinneqaqqaartuussasoq

Nuuk International Film Festivali unnugu aallartinneqarpat isiginnaagassiaq pisimasuinnik tunngaveqartoq Life of the Edge filmertarfimmi siullertut takutinneqassaaq.

Isiginnaagassiaq imminut toqunnermik pinaveersaartitsinermut tunngassuteqarpoq, isiginnaagassiallu Nuuk International Film Festivalimi takutinneqarnissaanut Nuuk International Film Festivalip nipangiutiinnarneqartartut oqaluuserineqarnissaannut inissaqartitsinissamut inuiaqatigiinni akisussaaffimmik tiguserusunneranut pissutaavoq.

Festivali tusagassiuutinut nalunaarummi allappoq.

Filmfestivalimi pisortap, Pipaluk K. Jørgensenip isiginnaagassiaq isiginnaareerpaa, taassumalu isiginnaagassiaq attortissutigingaatsiarsimallugu isertuutinngilaa.

- Isiginnaagassiap ‘Life on the Edge’-ip isiginnaarnerani attortingaatsiarpunga. Tamanna ilungersuussilluartup, Aqissiaq Nuka Semsenip nunatsinni imminut toqunnissamik ullut tamaasa pinaveersaartitsinermik pingaaruteqartumik suliaqarneranik takusaqarnerup sakkortuneranik ilaatigut pissuteqarpoq.

- Aamma isiginnaagassiap imminut toquttoqartarnerata qanoq ilungersunartigineranik eqqaasitsineranik pissuteqarpoq, taanna tusagassiuutinut nalunaarummi oqarpoq.

Nipangersimanngisaannassasugut

Filmfestivali imminut toqunnissamik pinaveersaartitsinermut nunarsuaq tamakkerlugu ulloritinneqartumit sapaatip akunnera qaangiuttoq aallartittussaavoq, festivalilu inuiaqatigiinni ukioq manna akisussaaffimmik tiguserusunnerani festivalip tusarliiffiusinnaanissaa, tarnikkullu peqqissuunerup nipangersimanngissutiginngisaannarnissaa pisortamut pingaaruteqarpoq.

- Taamaammat ammaanermi siulliullugu takutinneqartussamut isiginnaagassiap ‘Life on the Edge’-ip aalajangerneqarnera ajornaatsuuvoq, tamatumalu saniatigut festivalip ilarujussua inuunermi annernartut pillugit oqaloqatigiinnissamut tunngassuteqarluni, taanna oqarpoq.

Filmfestivalip unnugu ammaanermi siulliullugu aallakaatinneqartup saniatigut soorlu ‘My Fathers Daughter’ aamma ‘Pigen med nålen’ filmfestivalip septembarip 21-ata tungaanut aaqqissuunneqarnerani isiginnaarneqarsinnaapput.

Ukiunut tamanut naleqquttunik isiginnaagassaqartoq festivalip naggasiutigalugu oqaatigaa.