Isiginnaagassiamik takutitseqqaarneq assigiinngitsorpassuarnik misigissuseqartitsisoq

- Misigisat takusallu sakkortulaaramik oqaaserpaleruminaappoq. Kisianni timera nammineq oqaluttuarpoq, soorlu uulikullattajaarlunga, Cecilie Geisler oqarpoq.

Taanna Nuummi kulturip illorsuani Katuami isiginnaartarfimmi allagartalersuinerit takutinneqaqqammersullu taama oqarpoq.

Taassuma filmertarfimmi ulikkaangajaqqalluinnartumi isiginnaagassiamik takutitsiffioqqaartumi isiginnaagassiaq Kalak, Kim Leinep inuunermini pisimasunik oqaluttuarneranik tunngaveqartoq isiginnaaqqammerluinnarpaa.

Isiginnaagassiallu sakkortunera isiginnaariarsimasut filmertarfimmit aniasut kiinaanni arajutsineqarsinnaanngilaq.

Isiginnaarsimasut ilaat misigissutsitigut attortisimaarput, ilaasa isiginnaagassiap takuteqqaarneqarsimanera isiginnaartullu isiginnaagassiap naalerani ersaattaassinerat nuannaarutigaat. Eqimattakkaanilu oqallinnerit amerlanerpaat isiginnaagassiap nuannernera, sakkortunera ilaasalu oqaasertalersinnaaneraat ersersippaat.

Nammineq inuunermik atuakkiap Kalaap isiginnaagassiarineqarnera ippassaq takuteqqaarneqarpoq, isiginnaariartulli misigissusaat sakkortupput. Assi © : Nicole Sander / KNR

- Naluara, naluippara, Minik Møller isiginnaagassiap akunnerni marlunni aallakaatinneqarnerata kingorna anillakkami oqarpoq. Taanna isiginnaagassiamik takutinneqaqqaartumik aatsaat siullermeerluni isiginnaarpoq, taassumali tamanna oqaasertaleruminaatsippaa:

- Sakkortuvoq, oqallisigineqarneq ajortunik takutitsivoq, kisianni naluara qanoq nassuiassanerlugu, taanna nipaatsumik eqqarsaatiginnippasilluinnartumillu oqarpoq.

Qanoq misigisimaneq nassuiaruminaatsoq

Isinnaagassiap aallakaatinneqarnerata kingorna inersuarmi silarlermi isiginnaagassiap aallartinnginnerani kinguleriiaattut akornanni pissanganermit naatsorsuuteqarnermiillu misigissutsit allarluinnaapput.

Naallu amerlanerit oqaluttuap qanoq ittup takutinneqalernera ilisimalluareeraluarlugu isiginnaagassiap kingorna misigissutsinik sakkortuunik misigisaqarput.

Isinnaagassiap aallartinnginnerani misigissutsit allarluinnaapput. Assi © : Nicole Sander / KNR

- Timiga iluaappoq. Sakkortuunik sceneqarsinnaammata timiga iluaalaarpoq.

- Isiginnaagassiap ingerlanerani misigissutsit tamaasa atorpakka, oqaluttuarmi sakkortulluinnartuusoraara. Taamaammat misigissutsit sakkortuut maanna initupput, Aviaja Heuser isini immatsersimasut assanilu sakissaminiitsillugu oqarpoq, taannalu isiginnaagassiap naaneranit akunnerup affaata missaa qaangiuttoq suli malunnartumik attorsimavoq.

KNR-illu oqaloqatigisaasa piviusut sakkortuut ersersinneqarnissaat tamarmik naatsorsuutigisimavaat.

Piviusumik takulaarineq

Isiginnaagassiap immikkoortuinut sakkortuunut aarlerisaarut uterfigeqqikkutsigu.

Isiginnaagassiap aallartinnginnerani nipit ilisimaneqarluartut tassa mamakujuttut puui, qillertuusat ammarneqartut popcornitorpalunnerillu tusaaneqarsinnaalluarput. Isiginnaartitsiviup qaani isiginnaagassiortut marluk qaqipput. Tassa isiginnaagassioqataasoq, Pipaluk K. Jørgensen aamma isiginnaagassiortoq, Emile Hertling Péronard.

- Isiginnaagassiap ilaaniittut sakkortusinnaapput. Imaassinnaavoq taakku arlaannut sakkortusut, taamaammat isiginnaagassiap ingerlanerani ingerlasoqarsinnaavoq, Kim Leinep oqaaseqannginnerani taama kaammattuuteqartoqarpoq.

- Isiginnaagassiaq uanga oqaluttuaraara. Kalaallit Nunaannik naapitsinera aamma nuannaartarnikka nikallungassutigisimasakkalu. Uanga pillunga piviusunik ersersitsivoq, kisianni tamanna ilissinnut aamma sunniuteqassasoq neriuppunga, taanna oqarpoq.

Isiginnaagassiallu kingorna qisuariaatit ussersorpalungajattumillu aallartittumik nipaatsumik oqaloqatigiinnerup isiginnaagassiortut peqatigalugit piviusumik takulaarititsisimarpasippoq.

Oqaluttuamik sakkortulluinnartumik isiginnaagassiortut isiginnaartitsivimmiittut ersaattaanneqangaatsiarput. Talerpimmit aappaat pingajuallu tassaapput ilitsersuisoq Isabella Eklöf aamma atuakkiortoq Kim Leine. Assi © : Nicole Sander / KNR