”Kalak”-mi ilitsersuisoq: Danskit inuunerissuinnartut kalaallillu inuunerluttuinnartut saqqummiunneqassanngillat
Kalaallit danskillu filmiliaat Kalak persuarsiutigineqarluni Nuummi Katuami pingasunngornermi unnukkut takuteqqaarneqassaaq. Kim Leinep nammineq inuunini pillugu atuakkiaa, Kalak, filmiliami tunngavigineqartoq Nuummi Kulusummilu filmiliarineqarpoq.
- Pissangasorujussuuvunga, kalaaliunangami Kalaallit Nunaannut tunngasumik Kalaallit Nunaanni filmiliorpunga. Inuilli soqutigissagaat neriuutigaara, Isabella Eklöf oarpoq.
Filmimi ilitsersuisoq Sverigemeersoq, Isabella Eklöf, Kangerlussuarmi mittarfimmiittoq KNR-imit oqarasuaatikkut apersorneqarnermini taama oqarpoq. Taanna filmilioqataasut allat peqatigalugit filmip takuteqqaarneqarnissaanut peqataajartorlutik Danmarkimiit Nuummukarput.
Danskeq peqqissaasoq, Jan, inuunermini sakkortuunik misigisimasarpassualik nunatsinnut nuuttoq filmimi pineqarpoq. Taassuma misigisimasami qaangerniarnerini kalaallinut kulturiannullu akuliukkusuippoq. Kalavinngornissarli imaannaatsuinnaanngilaq.
Ingasattajaarunnaveersaagassaq
Atuagaq maannalu filminngortoq, Kalak, nunatsinni pissutsinik nuannersuinnaanngitsunik pisartunik imaqartoq ilisimaneqarpoq. Kalaallit qallunaallu maanga tikittut naapiffianni paqumigisarpassuit isummallu pigiliutiinnagarpassuit sammivaat. Inunnilli naqissusiissanngikkaanni taamaaliorneq qanoq iluatsinneqarsinnaava?
- Nunasiaataanerup kingunerisa ilaannilu kinguaassiutitigut kannguttaatsuliornernut tunngasut oqaluttuami sammineqartut immikkuullarissut mianersuunnartullu oqimaaqatigiisinniarneri uannut ajornarnerpaavoq, Isabella Eklöf oqaluttuarpoq.
Pisulli nuannersuinnaanngitsut itisilerneqarlutik takutinneqartariaqartut, ilitsersuisup pingaartillugu oqaatigaa.
- Pisut nuanninngitsut ammasumik, tamataqanngitsumik poortugaanngitsumillu takutinnissaat pingaartippara. Aammali danskit inuunerissuinnartut kalaallillu inuunerluttuinnartut saqqummiunneqannginnissaat pingartippara.
- Pingaarnertut inuttaq tassaavoq inuttaasuni tamani misigisaqarnerlunnerminit kingunerlutsitsinerpaasoq, avatangiisaalu tassaapput innuttaasut inuiaqatigiinni ingerlalluartorpassuit.
Nunasiaataasimanermut eqqaanaat
Atuagaq filmilu danskimit sakkortuumik kingunerlutsitsisimasumit inuiaqatigiinnullu akuliunnissaminik kissaateqartumit aallaaveqaraluartoq, Kalaallit Nunaata Danmarkillu akornanni pissutsinut aamma takussutissiivoq.
- Pingaarnertut inuttap angummi misigititai kingunerlutsippai. Kingunerlutitsininili pissutigalugu inuit naapitani sunnertarpai
- Filmi Kalaallit Nunaannut kingunerlutsitsisimasumut assersuutissaavoq, tassa naak ajunngitsumik isumaqarluni aammali ilaatigut nunat allamiut pissaaneqarpallaartarnerannut aserorterisunut assersuutaalluni, Isabella Eklöf oqarpoq.
Filmi Kalak nunatsinni filmertarfinni tamani piffissami qaninnermi isiginnaarneqarsinnaavoq.
