Filmilioqataasoq: Filmimi nersorneqartumi kalaallit filmiliaritittut qinngorneqarput

Nutaarsiassatsialammik allagarsigami pisiniarluni Brugsenimiippoq:

Filmi ’Kalak’ Spaniami San Sebastian filmfestivalertoqarnerani assigiingitsunik marlunnik nersornaaserneqarpoq.

- Nuannaarutigeqaara, Emile Hertling Péronard Kalammi filmiliornermi allaffissornikkut akisussaasuuspq taama oqarpoq.

Spaniamilu filmi takutinneqarmat filmilioqataasut isiginnaartitseqataasullu ilaat peqataapput. Namminerlu filmilioqataaffigisimasat saqqummersinneqaqqaarnerani misigisaq immikkuullarittuaannartoq Emile Hertling Péronardip oqaluttuaraa.

- Tamanna San Sebastianimi tusarnaartitsisarfitsialammi Kuursaalimik ateqartumi misigaarput, inersuaq 1500-inik issiavissaqartoq  ulikkaaqqavoq, Emile Hertling Péronard oqarpoq.

Nuannerlunilu ineriartuutaasoq

Filmimi pisuusaartitat sakkortuut nuisinneqaraangata isiginnaartut qisuariartartut filmilioqataasup maluginiarsimavaa, soorlungooq isiginnaartut qujamasunnerujussuat misigisarlugu.

- Tusarnaartitsisarfimmiit anillakkatta inuit utaqqipput ersaattaallutillu. Misigalugu attortisimanaqaaq, Emile Hertling Péronard oqarpoq.

Filmi 'Kalak' atuagaq Kim Leinemit atuakkiarineqartoq najoqqutaralugu suliaavoq.

- Isabella Eklöfip atuagaq qanoq filminngorlugu oqaluttuarineraa suleqataaffigalugu soqutiginartorujussuuvoq, filmiliortartutut tunniutiinnarusunngitsutut ilisimavarput. Filmi suleqataaffigalugu nuanneqaaq ineriartorfiullunilu, Emile Hertling Péronard oqarpoq.

Isiginnaartitseqataasut qaamaneqartut

Filmi 'Kalak' Janip nunatsinnut tikinneranut tunngasuutitaavoq. Filmiliaritittullu amerlanerit nunatsinneersuupput, Emile Hertling Péronardillu taakku tulluusimaarutigeqai.

- Filmi isiginnaareerakku San Sebastianimilu takuteqqaarneqarnera peqataaffigalugu, filmiliaritittut nunatsinniit peqataasut qinngorneqartut takusinnaavara. Tupinnaqaaq, Emile Hertling Péronard oqarpoq.

Emile Hertling Péronardip oqarnera naapertorlugu Berda Larsen, Connie Kristoffersen minnerunngitsumillu Vigga Tukula Nikolinetut inuttaaffilerneqarsimanerat tupinnartuuvoq.

- Tamarmik torrallaalluinnarput.

Filmi ’Kalak’ Danmakimi takuteqqaarneqarnissaa sapaatit akunnerannik ataatsimik sioqqullugu nunatsinni februaarip 28-ianni takuteqqaarneqassaaq.