Atornerluisoq pillugu danskit filmiliaat Europami filmfestivalimut toqqarneqartoq
Danskit filmiliaat "Kalak" Isabella Eklöfimit filmiliarineqartoq Europami San Sebastián Film Festivalimi unamminermi pingaarnermi nunarsuarmi takuteqqaarneqassaaq.
Taama Det Danske Filminstitut allappoq.
"Kalak"-mmik isiginnaartut Janip Kalaallit Nunaanni ilaquttanilu inuuneranut isertinneqarput. Inersimasutut sinnattoraa najukkami ataatsimoornermut ilaalernissani. Taakkununnga "kalak"-mmik taaneqartartunut.
Jan kinaanerminit peroariartorsimanerminillu qimaalluni inuuvoq, inuusuttuulluni kinguaassiutitigut nakorsaatinillu atornerluisuusimanermi kingorna. Tamanna peroriartorneranut ataataminit atornerlunneqarsimanermut attuumassuteqartoq, allaaserisami allassimavoq.
- Inuttut oqaluttuaavoq Kim Leinep inuuneranit tunngaveqartoq, filmiliarisinnaasimagakkulu tulluusimaarutigeqaara, Isabella Eklöf Det Danske Filminstitut naapertorlugu oqarpoq.
- Filmimi danskit kalaallillu kulturiat ataqqiniarsinnaasimavarput, filmilu tulluusimaarutigeqaara nunarsuarmullu avitseqatigiissutigisinnaagakku nuannaarutigalugu.
"Den Gyldne Muslingeskal"
Isabella Eklöf filmiliaqqaaminik ”Holiday”-imik Sundance-imi nunarsuarmi 2018-imi takuteqqaarneqarmat ilisimaneqalerpoq. Filmi nersornaammik Bodil-inik sisamanik tunineqarpoq ilaatigut Danmarkimi filmini pitsaanerpaatut arnanilu pingaarnertut inuttaalluarnerpaatut.
Filmimut ilitsersuut Kim Leine aamma Sissel Dalsgaard Thomsen suleqatigalugit allanneqarpoq. Det Danske Filminstittutimit tapersersorneqarluni Manna Filmimit filmiliarineqarsimalluni.
Filmimi inuttaasut ilagaat Emil Johnsen, pingaarnertut Janitut inuttaasoq, isiginnaartitsisartullu Asta August, Berda Larsen aamma Connie Kristoffersen pingaarutilinnik aamma inuttaaffeqarlutik.
Filmfestivali San Sebastián piffissami 22. - 30. septembari ingerlanneqassaaq, tassanilu Nikolaj Arcelsip filmiliaa "Bastarden" saniatigut pilersaarummi Perlakimi ilaalluni.
Filmini pitsaanerpaamut pingaarnertut nersornaat tassaavoq Den Gyldne Muslingeskal, angutini arnanilu isiginnaartitsilluarnerpaat uillut qaleruaanik sølviusunik tunineqassallutik.
"Kalak" Danmarkimi filmertarfinni 7. marsi 2024 takuteqqaarneqassaaq
