Meeqqat atuarfianni atuartunik isumaginninneq annertusarneqalersoq
Atuarfik Mathias Storchimi aamma Atuarfik Jørgen Brønlundimi atuartut saaffigisinnaasaanik inunnik isumaginninnermut siunnersorteqarneq ukioq manna atorneqalerpoq.
- Atuartorpassuit angerlarsimaffimmi tunuliaqutaat assigiinngitsut aallaaviullutik atuartut qisuariaataat atuarfimmi sakkortusinnaasartut arlaqaramik, Nielsine P. Kruse, Atuarfik Jørgen Brønlundimi atuarfiup pisortaa oqarpoq.
Angummanniapiloortoq
Kisianni inunnik isumaginninnermut siunnersorti ataaseq atuarfinnut marlunnut, katillugit 640-t missaanni atuartulinnut, naammanngimmat ataatsimik ilaneqartussanngortoq Avannaata Kommuniani ineriartortitsinermut ataatsimiititaliap siuliattaasua Siumumeersoq, Jens Kristian Therkelsen, nassuiaavoq.
- Socialrådgiverip nalunaarusiaa ataatsimiisitaliamut anngunneqarnikuuvoq. Tassanilu takuneqarsinnaalluni annertuumik suliassaqarnermi kingorna ilaatigut angummanniapiloortoq, Jens Kristian Therkelsen oqarpoq.
Kommunalbestyrelsip sapaatip akunnerani kingullermi sapaammi ataatsimiinnerani aalajangerneqarpoq Ilulissani atuarfinni inunnik isumaginnermut siunnersorti ataatsimik ilaneqassasoq.
- Assorujussuaq oqiallannarpoq. Pissutigalugu taanna skolesocialrådgivererput ataaseq atuarfinni marlunni uteqattaarluni sulisarami aamma malunnartumik suliassai annertusigaluttuinnarlutik. Quttannarpoq suleqateqalernissaminut taama suliassat annertutigisut kisermaakkunnaassangamigit, Nielsine P. Kruse oqarpoq.
Atuartitsinermi sunniuteqartoq
Atuarfimmimi inunnik isumaginninnermut siunnersorteqarneq iluaqutaalereersimavoq.
- Atuartut ajornartorsiortut tamakkua siullermik - skolesocialrådgivereqanngikkallaratta - uagut ilinniartitsisutut ilikkartitsiniarnitsinni immaqa allatigut ikiugassaraluagut paaserpiarneq ajornikuuagut; qanoruna ikiugassaasoq? Massakkut skolesocialrådgivereqaleriarami, taassumap ilinniagarigamigit tamakkua, pikkoriffigivai atuartunukua qanoq ikiorneqartussaaneri siunnersuuteqartarluni, Nielsine P. Kruse oqarpoq, nangillunilu:
- Tassami atuartoq paasineqaraangami qanoq innerminik aamma soorunalimi sunniuteqartarpoq klassip iluani. Ikiorneqaleruni taassumap aamma kinguneri erseriartulertarput.
Illoqarfiit atuarfiini tamani siunnersortit
Ilulissani atuarfinni inunnik isumaginninnermut siunnersortip aappassaa ukiup naannginnerani atorfinitsinneqarsinnaassasoq Avannaata Kommunianit neriuutigineqarpoq.
Tamatuma saniatigut Avannaata Kommunianit kommuunip illoqarfiisa atuarfiini tamani inunnik isumaginninnermut siunnersortinik atorfinitsitsisoqarsinnaanersoq misissuiffiginiarneqarpoq.