Kujalleq: Ineqarnermut akiliutinik akilinngitsuukkat ikilisinneqartut

Misiliutaasumik suliniuteqartoqarsimanera tamatumunnga pissutaavoq. Innuttaasummi akiitsullit ornillugit akiitsui pillugit siunnersorneqarnissaannik neqeroorfigineqartarput.
 
Suliniummilu angusat pitsaasut, Sara Olsvigip § 37 naapertorlugu apeqquteqaataanut akisummi atuarneqarsinnaavoq.
 
Suliniut 2017-imi aallartinneqarpoq ukiunilu marlunni ingerlanneqassalluni. INI A/S Kommune Kujallerlu suleqatigiillutik akiitsulinnik siunnersuisartoqatigiinnik, ilaqutariinnut ineqarnermut akiliummik akilinngitsuukkanik akiitsoqartunut attaveqalersitsisussanik pilersitsipput.
 
Innuttaasut inigisaminniiginnarsinnaanissaat, tamatumunngalu peqatigitillugu kommunimut allanullu akiitsuminnik akiliinissaat suliniummi qulakkeerniarneqarpoq.

AAMMA ATUARUK Borgmesterit akiitsorineqartut amigaatigaat

Ukioq manna qaammatini siullerni pingasuni oqaloqateqarnerit 422-t ingerlanneqarput, taakkulu sisamararterutaat sinnerlugit akiitsuminnik ingerlannaaq akiliisimallutik.
 
Pingasorarterutaasullu akilersuinissamik kingusinnerusukkulluunniit akiliuteqarnissamik isumaqatigiissuteqarput.
 
Angusallu taakku pitsaasuusut, naalakkersuisup akisussaasuusup Pele Brobergip akissutimini oqaatigaa. Suliniutigineqartulli sunniutaa pitsaasoq sivisunerusumik ingerlaannassanersoq oqaatigissallugu siusippallaarpoq.
 
Suliniut Naalakkersuinikkut Ataqatigiissaarisoqatigiinnit ukioq manna januaarip qaammatani oqaluuserineqarpoq aalajangerneqarporlu Naalakkersuisut kommunillu siunnersuinermik suliniutaasup kommunit sinnerinut 2019-ip ingerlanerani atuutsinneqalersinnaaneranut periarfissat misissussagaat.

AAMMA ATUARUK Pisortanut akiitsut amerliartuinnarput