Ammanerulersitsiniarneq isumaqatigiinngissutaasoq
Allannguutissatut siunnersuuteqartup Peter Olsenip (IA) oqallinnerup ingerlarnga isorisassaqartinngilaa. Parteeqatigisimasaali, Naaja Nathanielsen, isumaqataanngilaq.
- Alianarpoq, inuiaqatigiinnummi tunngasunut oqallisigisassat pingaaruteqaqisut, nalornineq pissutaalluni, suliluunniit oqallisigineqanngitsut mattunneqarput. Isumaqarpungalu taamatut aalajangiissagaanni tunngavilersuutigineqartut pitsaanerusariaqartut, attaviitsoq Naaja Nathanielsen oqarpoq.
Inatsisartuni oqallinnerit paasiuminaalligaangasa ilaasortat oqallinneq tunuinnartaraat, taanna isumaqarpoq.
Aamma atuaruk Nalunaarasuartaateqarnermik ammanerulersitsiniarneq unitsinneqarpoq
Akerlianilli Inuit Ataqatigiinneersoq, Peter Olsen, naapertorlugu oqallinneq pissusissamisoortumik ingerlanneqarsimavoq, namminersortunngorsaanissamullu apeqqusiinissaq pisariaqarsimanani.
Nunatsinnimi, ikeqisunik innuttaasulimmi, unammilleqatigiinneq imminut akilersinnaanavianngitsoq, Peter Olsen nassuiaavoq.
- Naluara suna oqallisigisariaqarnersoq. Tamatta nalunngilarput Nunatsinni inuit ikitsuararsuulluta unammilleqatigiinneq Nunatsinni iluamik atorsinnaanngilaq. Minnerunngitsumik mobiilinut imaluunniit oqarasuaatinut attaveqaatinut tunngatillugu Nunatsinni ataasinnguamilluunniit namminersortunngorsaaneq atorsinnaanngiivippoq, Peter Olsen oqarpoq.
Aamma atuaruk NALUNAARUSIAQ Telekkut sullissineq ammanerulersinneqarpat iluanaarutaassaaq
Nalunaarasuartaateqarnermut aqutsisoqarfiup ammanerulersitsinissaq ukiuni kingullerni sulissutigisimavaa, tamannalu anguniarlugu Copehagen Economics nalunaarusiortussatut suliakkerneqarsimavoq.
Nunatsinnilu telekkut namminersortunngorsaasoqarpat nunatta karsia 69 milliuunit koruunit 112 millionit koruunillu akornanni iluanaaruteqarsinnaasoq, nalunaarusiap inernerata takutippaa.
Aamma atuaruk Telep namminersortunngorsarneqarnissaanut Kalaallit Nunaat piareersimanngilaq
Tamannali Peter Olsenimut apeqqutaanngilaq.
- Isumaqarpunga ajunngitsumik ingerlasoq, tamaattumik aalajangiupparput taamatut isikkoqarnissaa. Aamma Inatsisartut amerlanerussuteqarlutik taamatut aalajangerpaat. Naluara suna ajornartorsiutaanersoq apeqqutissaanersorlu, Peter Olsen oqarpoq.
Naaja Nathanielsenili isumaqataanngilaq. Inatsisartut ajornannginnersiuillutik aalajangiisimasut, taanna isumaqarpoq.
- Oqallinneq tunuinnarneqarpoq ajornannginnersiuillunilu aalajangiisoqarpoq. Taannalu politikkikkut suliassanut imaannaanngitsunut nalorninermik takutitsinerusoq sanngiissusermillu ersiutaasoq isumaqarpunga.
Aamma atuaruk Attaveqarfissamik tuniniaavimmik pilersitsisoqarnissaa Pallep suli neriuuteqarfigilluarpaa
-Avinngarusimasuni sullissineq pitsanngorsarneqarsinnaanera qanorlu akeqarsinnaanera pillugit oqallisigineqanngilaq. Sammisaq oqallisigiuminaappat itigartiinnarnissaa ajornannginneruvoq, Naaja Nathanielsen oqarpoq.
