Telep namminersortunngorsarneqarnissaanut Kalaallit Nunaat piareersimanngilaq

Unammilleqatigiinnissamut piareersimannginnermut naliliisoq tassaavoq  unammileqatigiinneq pillugu immikkut ilisimasalik Niels Rytter.

Telep namminersortunngorsarneqarnissaanut Kalaallit Nunaanni inukippallaarpoq,  tamannalu    atuisut akilersinnaassanngilaat aamma attaveqaatit ajunnginnerulernerannik kinguneqarnavianngitsoq, unammileqatigiinnermut immikkut ilisimasalik naliliivoq.

Tele-kut attaveqaatit namminersortunngorsarneqarpata tamanna atuisunut qarasaasiallu attaveqaataannut akikinnerulernissaannik kinguneqarnissaa Niels Rytterip qularnartoqartippaa.

Telemi attaveqaatit pilersaarutit malillugit ukiormanna kingusinnerusukkut namminersortunngorsarneqarpata internetikkkut attaveqaatit sukkanerusut akikinnerusullu pillugit unammillertoqarsinnaavoq. 

Tele-mi attaveqaatinik suliaqartut allat aallartippata,  Tele-Postip maannakkut akigititaannut unammillersinnaanissaq periarfissaalersussaavoq.

Unammillersinnaanissaq tele-mik suliaqalersussanut ajorsarnerussasoq, Niels Rytterip siulittuutigaa,  taanna unammileqatiginnermut tunngasunik ukiuni 35-ni suliaqarpoq, taanna Danmarkimi unammilleqatigiinnermut aqutsisoqarfimmi  atorfeqarpoq, tele mut tunngasunik immikkut sammisaqarluni.

Nuup avataani unammillernissamut periarfissaqanngilaq.

- Kalaallit Nunaanni  innuttaasut 56.200it missaannik amerlassuseqarput, taakualu siammasissorujussuarmi najugaqarput, unammillersinnaanissamullu periarfissatuaasoq tassaavoq Nuuk, illoqarfiit sinneri nunaqarfiillu niuerniarfigissallugit tunngavissaqanngilaq Niels Rytter oqarpoq.

Assersuutigalugu Nuummi mobiilit attaveqaataannut neqerooruteqarsinnaasut ataaseq marlullulluunnit kisimik periarfissaqarput.

Tamanna paasineqareersimasinnaagaluarpoq namminersortunngorsaanerup kingunerisinnaasaanik nutaamik naatsorsuusiortoqarsimagaluarpat.

Namminersortunngorsaanissamut naatsorsuusiarineqartut nutaanngippallaarput aamma  qularnartuupput, Niels Rytter oqarpoq.

-Namminersortunngorsaanissamut innersuussutigineqartut tunngavilersutaat naammanngillat, kingunerisinnaasaanik naatsorsuinerit tamakkiisut amigaatigineqarput,   taamaattummik namminersortunngorsaanissamut mianernarpoq telemi niuerneq annertuunik akornuserneqarsinnaammat. 

Niels Rytterip isumakuluutiginerusai tassaapput,  internet-imik pilersuinissamik pisussaffik  aamma avinngarusimasuni telefonimik kiffartuussineq telep namminersortunngortinneqaratigut ajortumik kinguneqarsinnaanerat