Nalunaarasuartaateqarnermik ammanerulersitsiniarneq unitsinneqarpoq
Siunnersuummik nutaamik taasisuni 16-it akuersipput. Siumut, partiillu illuatungiliuttut Inuit Ataqatigiit Partii Nalerarlu tassani akuersisuupput, Demokraatit, Atassut attaviitsorlu Naaja Nathanielsen itigartitsisuullutik.
Allannguutissatut siunnersuut IA-mit saqqummiussaqarnerata kingorna saqqummiunneqarpoq, tassanilu Naalakkersuisut Tele-postimik piginnittuunermut suliaqarnissaannik Inatsisartunut aalajangiiffigisassatut siunnersuusiortussanngortik, tassanilu nalunaarasuartaateqarnermut tunngassuteqartuni namminersortunngorsaanissamut pilersaarutit naatsorsuutigineqartullu takuneqarusupput.
Naalakkersuisullu piginnittuunermut periusissiamik, nalunaarasuartaateqarnermik ammanerulersitsinissamut aaqqiissutissartaqanngitsumik pilersitsinissaat, Inatsisartut maanna akueraat.
Demokraatit ikinnerussuteqarnerminni oqaaseqaatiminni erseqqissaatigaat, suliap ingerlanneqarnera Inatsisartut ataatsimiinnerisa sivisuallaarneri peqqutigalugit, Telemi aqutsisunik ataatsimeeqateqarnissat pilersaarutit pingitsoorsimanerat nammagisimaanngilluinnarsimallugu.
- Telemi aqutsisunit paasissutissanik pissarsinissaq ataatsimiititaliami amerlanerussuteqartut soqutiginnippasinngillat, allaannguutissatullu siunnersuutip saqqummiunneqartut tunngavilersorneqanngitsup akuerinissaa soqutiginartinnerorpasillugu, Demokraatit siunnersuutigineqartumut ikinnerussuteqarlutik oqaaseqaatiminni taama allapput.
