Kalaallit Nunaanni utoqqaat puigortunngortartut amerliartorput

Ukiut siuliinut naleqqiullutik Kalaallit Nunaanni utoqqaat utoqqalinerusalerput aamma nunatsinni inuiaqatigiit aaqqissuussaanerat allanngorsimavoq, utoqqaat sungiusimasaattut ilaqutariit imminnut ataqatigiikkunnaarsimapput, tamatuma kingunerisalersimavaa utoqqaat kiserliortunngornermikkut puigortunngortarnerat.

Narsami Utoqqaat Illuani sulisut tamakku pillugit pikkorisarneqarput.

Qaarluttoq Qujaakitsoq oqarpoq, ilaqutaasut akueriuminaatsittaraat utoqqartamik puigortunngornermik nappaateqalersimanera.

-Suliagut amerlalaatarnermik ikiuiniaraluarluta paatsiveerusimaalaartarpugut.

Dana Adolfsen-p pikkorissarnerminni paasisimanerarpaa, ilaqutaasunik tinnersaalaarlutik paasissutissiisarsinnaagaluarlutik.

-Sianersinnaasarpugut ilaqutaasunit alakkaneqalaarnissaa pillugu aamma sulisunut erseqqissumik puigortunngorneq pillugu paasissutissanik tunioraasuugutta immaqa ornikulanerulissagaluarpaat, ilaatigut taama oqarpoq Dana Adolfsen.

Pikkorissaasup Rosa Marie Elsner –p ilumoornerarpaa, ilaqutaasorpassuit puigortunngortup pissuserisartagaanik ilisimasakippallaartut.

-Puigortunngortut sivikitsunnguamik itertutut ilisarput eqqaamasaqalerlutik, taava uagut ilaqutai qaaqqupallattarpagut, taama nassuiaavoq Rosa Marie Elsner.

Aamma ilumoornerarpaa nunatsinni puigortunngortarneq inuiaqatigiit inooriaasiannik aallaaveqarmat.

-Massakkut inuppassuit kiserliortalerput, ilai pulaaneqarpiarnatik.Ilai oqimaatsunik nalaataqarsimallutik oqaloqatigiissutigisinnaanagit, qamuuna alisunnerujussuaq atulersimallugu taamaalillutik puigortarneq aallartisarsinnaavaat, taama naliliivoq Rosa Marie Elsner.

Taanna aamma oqarpoq, nunatsinni utoqqaat 2% -tii puigortunngorsimasut eqqoriarsinnallugu, tassalu kisitsisinngorlugit 200-t 250-llu missaanniittut.