Qinersisartut ilaquttaminnik nunaqqatiminnilluunniit qinerserusuttarnerat suli malunnarpoq, tamannalu Siumut iluaqutigaa. Handelshøjskolimi København-imiittumi aningaasarsiornermut tunngasunik ilinniarsimasoq Lise Lyck Nunatsinnilu pissutsinut ukiorpassuarni malinnaasoq taama naliliivoq.
- Siumup qinersisaasa amerleriarneri, Inatsisartunilu ilaasortaatitaamik amerlassussaasa nikeriannginneri, qinersinermik avataaniit malinnaasuulluni tupaallannarnerpartarigunarpaa, Lise Lyck oqarpoq.
Naalakkersuisunut ilasortaasimasut Siumumeersut marluk ilassinnissutinik atuivallaarsimanerat tassa Siumumut ajoqutaasimarpasinngilaq. Tassungalu atatillugu Nunatsinni periaatsit oqaluuserineqarpiarneq ajortut patsisaatippai.
- Kalaallit Nunaanni assigiingitsunik attaveqatigiiaattoqarsimasinnavoq tassa netværkerpassuaqarsinnavoq ilaqutariit akornanni inuiaqatigiillu ilaanni qinersinerni ileqqoqartunik. Taakkualu allaanerusunik qinersissappata ajornerusumik pisoqartariaqassaaq, Lise Lyck naliliivoq.