Qaanaami ikuallattoqarneratigut ilaqutariik angerlarsimaffeerupput

Juullip nuannersui ilaqutariinnguanut sisamanik meerartalinnut sivikitsuinnaavoq. Naneruutit silami ikumatillugit puigukkat ikuallannermik pilersitsipput, ilaqutariillu illuat nunguilluni ikuallappoq.

Skrevet af Jens Thorin

25. december 2008 17:08

Ilaqutariik ullaaq tallimap missaani iterput, ini ikuallalersimasoq. Qujanartumilli igalaakkut anipput annertunerusumillu ajoquseratik. Anaanaq putsumik ajoqusersoralugu napparsimmavimmi misissorneqarpoq, ataataq isikkamigut kilerluni. Meeqqat arfinilinnik, arfineq pingasunik, aqqaneq marlunnik 15-inilullu ukiullit ajoqusinngillat.

Qaanaami innuttaaqataasut ikiuutilertorput. Pununa Karlsen, Arnannguaq Suersaq, Mette Eipe Stig Rothberg-ilu ullumi ataasinnguinnartoq Lokalradio ikiorsiullugu katersuinialerput.

Ullup ingerlanerani Qaanaami illuni naasaalluni katersuiniartoqalerpoq.

Nalunaaqutaq sisamannguinnartoq 11.640 koruuninik aningaasanngorlugu katersuereerput, maannalu ilisimaneqanngikkallartunik amerlassusilinnik ilaqutariik bankkonto-annut ikioraasoqareerluni.

Ikiuiniartut oqaatigaat, aningaasat katersorneqartut saniatigut aamma siniffinnik, madrassinik, igaffimmi atortunik ilisivinnik, qullernik TV-mik kiisalu puusiarsuarnik 30-it sinneqartunik atisanik imaqartunik katersuisoqareertoq.

Kisianni ilaqutariik suli ikiorneqarnissamik pisariaqartitsipput. Pigisatik tamakkerlugit annaavat.

Ilaqutariit ikiorusukkaani aana bankimi kontoat: 6471 1505960.

Din mening er vigtig for os. Vi modtager gerne ris eller ros om denne artikel.