Københavnimi kalaallit juullerpalaartitsisut nuannaraat
Juulleriartornerani tuniniaaneq, nutaatut ulluni marlunni ingerlanneqartussaavoq.
Paffequtit aamma tajarutinik taaneqartartut, aaqqatit ammit aammalu uunartunut ilitsiviit. Tamakku ilagiinnarpaat Kalaallit Illuanni Københavnimiittumi juullimut ullumi tuninialikkat.
Ullaaralaamiit aggiasoqarluarnera Kalaallit Illuanni avammut tusagassiisartup, Vivi Nielsenip nuannaarutigaa:
- Isaasoqarluartoq nuannaarutigaara. Ukioq manna tuniniaaneq ullunik marlunnik sivisussusilerlugu misilipparput, tassami siorna takuniaasut oqartarmata ulloq ataasiinnaq naammanngitsoq. Taamaalilluta inuit amerlanerusut periarfissinniarlugit ullunut marlunnut sivitsorparput.
Tuniniaasut ilagaat Margrethe Rasmussen:
- Tuniniarpakka nasat, tajarutit aammalu CD-liarput. Nuanneqaaq inuit qangali takusimanngisakka maani takugakkit, oqarpoq.
Tuniniaasunut ilavortaaq meeqqat inuusuttuaqqallu pillugit suliniaqatigiiffik Nanu Børn, taakku siullerpaamik Kalaallit Illuanni tuniniaasunut ilaapput, tuniniagaraat kaffi kaagillu:
- Tuniniaanitsinni sinneqartoorutit Kalaallit Nunaanni meeqqanut inuusuttuaqqanullu suliniutitsinnut tussapput. Meeqqat inuusuttuaqqallu ulluinnarni atugarliuteqartut juullimi nuannisaalaarnissaat anguniarlugu aningaasanik katersivugut, aammami ajunngisaalaartarneq juullip oqariartuutigimmagu, Janemaria Pedersen oqarpoq, taanna akissarsiaqaatiginagu Nanu Børnimi suleqataasuuvoq.
