Meeqqat Kommuneqarfik Sermersuup angerlarsimaffiup avataanut inissitai takornarialerisunit Kapisilinni paarineqarnerannik KNR-ip allaaserinninneranit qaammatit pingasut maanna qaangiupput. Meeqqammi nakkutigisariallit perorsaanermik ilinniagaqanngitsunit illuaqqani paarineqartarput.

Nuuk Outdoorip paarsinerani pissutsit isornartoqaqisut iliuuseqarfigineqassasullu borgmesteri Avaaraq S. Olsen (IA) taamani oqarpoq.

Meeqqalli Kapisilinni illuaqqaniitinneqarunnaartut kommunip ullualuit qaangiummata nalunaarutigaa tusagassiuutinullu nalunaarummi Meeqqanut Ilaqutariinnullu Ingerlatsivimmi pisortaq Frederik Lundblad ima oqarpoq:

“Suliniuteqarluni inissiinerit nalinginnaasumik atussallugit ornigisarinngilarput. Nakkutilliinitta neqeroorutip amigaateqarnera takutimmagu, taanna atorunnaarsikkiartorneqassasoq aalajangerpugut.”

Meeqqalli inuusuttullu arfineq-marluk Nuuk Outdoorimit suli paarineqartut KNR-ip allagaatinik takunnissinnaatitaaffigisaani Kommuneqarfik Sermersuumeersuni paasinarsivoq.

Meeqqat Kapisilinniikkunnaarsimapput, Nuulli ilaani Nuussuarmi illumut Qinngorpumilu inissiamut nuussimallutik. Tamanna allagaatinik takunnissiinnaatitaaffigisatsinni kommunimit marsip arfineq-aappaani suliarineqartumi takusinnaavarput.

Suliffeqarfik taanna Nuuk Outdoorimik ateqarunnaarluni Isunngamik marsip arfernani ateqalerpoq, siornatigullu apersugarput Kenneth Thomsen, tassani marsip qiteqqunnerani suliunnaarpoq.

Suliffeqarfimmik piginnittut pingajuat Fie Anette Lemke Hansen februaarimi aamma suliunnaarpoq. Taamaalilluni Páll Fródi Joensen tassani kisimi pigininnittuulerpoq. Meeqqat suliffeqarfimmit suli paarineqarput.

Eqqaamiuusut toqqissisimanngitsut 

Meeqqat inuusuttullu Nuuk Outdoorimit, maanna Isunngamit, 2023-mi upernaakkulli paarineqartut, Kapisilinniillu decembarimi nuuttut Nuussuarmi innuttaasorpaalunnit KNR-imut saaffiginnissutigineqartarput.

Kapisilinni innuttaasut taamatorpiaq aamma misigisaqarput, paarineqartummi nunaqarfimmi eqqissiviilliortitsikulasarnerat KNR-imut ukiarmi saffiginnissutaavoq.

Nuussuarmi najugallit meeqqat ulloq unnuarlu angerlarsimaffiannik akuerisaanngitsumik eqqaamioqaleramilli pissutsit allangornerat oqaluttuaraat.

Meeqqat paarineqartut qunusaarisarnerat pissutigalugu meeqqat qimmimik annerusserusukkunnaarsimapput, unnuaq tamangajaat nipiliortoqartarpoq, politiit orninneqakulapput puuiaasallu ikiaroornermi atorneqarsimannguatsiartut nassaarineqartarput.

Nuussuarmi najugallit kingunerusussat aarleqqutigigamikkit apersorneqarusunngillat.

Innarluutillit takornarialerisunit paarineqartut

Meeqqat Nuuk Outdoorimi toqqissisimarpasinngitsut aamma meeqqat takornarialerisuusimasunut inissinneqassanngitsut Meeqqanut Ilaqutariinnullu Ingerlatsivimmi pisortaasimasoq, Severin Berg taamani oqareeraluarpoq:  

- Tassami, nunarsuaq pitsaanerpaaq najugarigaluarutsigu, Nuuk Outdoor meeqqanik nakkutiginnittuutissanngikkarluarparput, Severin Berg oqarpoq.

Nuuk Outdoorimit suli paarineqartuni arfineq-marluusuni marluk 18-ileereerput. Aappaata annertuumik innarluutilinnut ulloq unnuarlu nakkutigisarialinnut tulluartumut inissinneqarnissi kommunimit utaqqivaa. Aappaatalu kommunip ingerlataanut 18-ileereersunut ulloq unnuarlu angerlarsimaffianniilernissi utaqqivaa.     

Tassa imaappoq inuusuttut nakkutigineqarnissamik immikkut pisariaqartitsisut perorsaanermik ilinniagaqanngitsunit paarineqarlutik.

Suliffeqarfiup maanna piginnittua, Páll Fródi Joensen, KNR-imit attavigineqarami oqarpoq, meeqqat aamma taakku pisariaqartitaat suliffeqarfiup ukkatarigai, taamalu ulloq unnuarlu angerlarsimaffittut akuerineqarnissartik sulissutigigitsik:

- Piumasaqaaterpassuit naammassisassaapput. Imminulli ingerlatittumik ulloq unnuarlu angerlarsimaffinngornissarput sulissutigaarput.

Millionerpassuit

Meeqqanik angerlarsimaffiup avataanut inissiinermi kommuni akikinnersiuilluni Nuuk Outdoor toqqartaraa isumaqarnarsinnaagaluartoq taamaappasinngilaq.

Kommuneqarfik Sermersuup meeqqanik allamut inissiisarnerani ulloq unnuarlu angerlarsimaffissaalatsisarnera aaqqinniarlugu kommuni Nuuk Outdoorimut januaari 2023-miit ulloq manna tikillugu 28 millionit koruunit sinnerlugit akiuliuteqareerpoq.

Takornarialerisuusimasut ukioq manna qaammatini marlunni siulliinnarni 2,1 millionit koruuninik akiliuteqarfigineqarput -  naak Nuuk Outdoorimut inissiisarnerup atorunnaarsikkiartuaarnissaanik kommuni oqariartuuteqaraluarluni qaammamut 1 millioni koruunit sinnerlugit akiliisarpoq.