Pirattaxanik taaneqartartut taxartitsisartunit akerliussutsimik takutitsiffigineqartut

Illoqarfinni Nuummi, Maniitsumi, Sisimiuni Ilulissanilu taxat akerliussutsimik takutitsipput. Pirattaxanummi tassa taxateqaratik namminneq biilitik atorlugit akiliisitsillutik biiliussisartunut naammatsipput. Tamakkulu inatsisit aqqutigalugit unitsinneqartariaqartut Nuummi taxanik suliffeqarfiit marluk pisortaat isumaqarput.

Nuummi Kommunip allaffiata silataani taxarpassuit ullup qeqqanut ataatsimoorput, aquttui piginnittuilu eqqissisimasumik akerliussutsimik takutitsipput. Nuuk Taxi A/S aamma Taxagut pisortaat allakkiamik Kommuneqarfik Sermersuup borgmesterianut Avaaraq Olsenimut tunniussipput.

- Kommunalbestyrelsimi suleqatinnut aamma apuukkumaarpara, qujanarlu, Kommuneqarfik Sermersuumi borgmesteri Avaaraq Olsen oqarpoq.

Akerliunertillu biilit siggartaataat atorlugit nalunaaqutaq ullup qeqqartoq malunnartimmassuk nipeqaqaaq.

- Tassa pirattaxat Nuummi amerlatsinnikuunermik uagut inuuniutigalugu taxartartuusugut malugilernikooqigatsigu.

Taxagummi pisortaq Jakob Olsen taama oqarpoq.

 Nuuk Taxi A/S-imi pisortaq Janus Eigaard assingusumik aamma oqarpoq:

- Oqaatigilluaannaraanni taamaaliortut malersorpagut, politinullu nalunaarutigisarlugit, paasivarpulli atuuttumik inatsiseqanngitsoq, tamannalu akuerisinnaanngilarput. Inuppassuuvugut taxartartutut maleruagassat malillugit inuussutissarsiortut, tamannalu maani Nuummi sinerissamilu illoqarfinni arlaqartuni eqqumaffigeqquarput, Nuuk Taxi A/S-imi pisortaq Janus Eigaard oqarpoq.

Unammillerneq naapertuutinngitsoq

DPirattaxarpassuit unammillernermik naapertuutinngitsumik pilersitsivoq.

Sisimiuni taxatartut Qeqqata Kommuniata saavani akerliussutsimik aamma takutitsipput. Sisimiunimi aamma pirattaxanik taasagaat amerliartuinnartut taxaatillip malugisimavaat.

- Nalunngilarput isertitsissagutta taxameteri toortussaavarput akileraassagutta, kisianni taakkuli ajugaaniarsaralutik uagutsinniik akimik appasinnerullutik arsaartuineq taanna naammaginarunnaariartorami massakkut ullutsinni. Qanoq oqassaagut? Qinngarnarluni.

Sisimiuni taxaatilik Nuka Karl Johansen taama oqarpoq.

Nuummili ukiualuit matuma siorna taxateqaratik namminneq biilitik atorlugit akiliisitsillutik biiliussisartut amerlasimanngillat, taxat isertitaannut akornutaanatik. Maannakkulli amerliartuinnarneri taxaatilinnut naammaginarunnaartoq, Janus Eigaardip oqaatigaa.

 - Ukiualuit matuma siorna biilit ikittunnguit akilersillutik biiliussisarput. Tamanna inooqataaffigisinnaasimavarput, massakkulli ingasappallaalerpoq, biilerpassuilli maanna akilersillutik biiliussisarput. Ilisimavarput uagutsitulli akileraarneq ajortut. Taamatut unammillerneqarnerput naapertuutinngilaq, Janus Eigaard taama oqarpoq.

Politikerinut kajumissaaruteqartut

Nuuk Taxi A/S, aamma Taxagut pisortaat ataasiinnarmik neriuuteqarput. Tassa politikerit inatsisiliortariaqartut, siunissamilu pirattaxanik taaneqartut nungusarneqalissasut.

- Kissaatigaarput politikerigut inatsimmik suliaqarlutik aaqqiinissaat, taamaalilluta inatsimmik malittarisaqarluta ingerlalissagatta. Nuuk Taxi A/S-imi pisortaq Janus Eigaard KNR-imut taama oqarpoq.

Taxagutilu isumaqataavoq:

- Neriuutigivarput pirattaxat soorunami nungusarneqassasut, uagut atorfissaqartikkatsigit taakkua inuuniutigigatsigit nammineq.

Nuummi taxartitsisartut Taxagutimi pisortaq Jakob Olsen Andreas Poulsenimut taama oqarpoq.

Ineqarnermut Attaveqaasersuutinullu Naalakkersuisoq Hans Peter Poulsenip nunatsinni taxateqaratik namminneq biilitik atorlugit akiliisitsillutik biiliussisartut pinaveersaartinniarlugit inatsisiliortoqarnissaanik suliamik ingerlasoqartoq oqaatigaa. Erseqqissaatigaali inatsit pineqartoq Danmarkip suli tigummiarmagu, Danmarkimilu angallannermut ministeqarfimmut saaffiginnissutigereernerarpaa.

- Suliassartavia danskit naalakkersuisut suliarisussaavaat. Taanna suliassartavia suliarineqareerpat uagut Inatsisartunut Naalakkersuisuni eqqartoreerutsigu taava taanna atuutilernissaa naatsorsuutigisassaavoq. Taamaammat piaartumik suliakkiinermik suliaqarpugut, aammalu uteqattaartumik.

Ineqarnermut Attaveqaasersuutinullu Naalakkersuisoq Hans Peter Poulsen taama oqarpoq.