Royal Greenland amigartoorujussuarpoq pisortaanerli ernumanngilaq

Akileraarutit peerneqartinnagit 255 millionit koruuninik Royal Greenland ukioq kingulleq amigartoorpoq.

Tamanna naammaginanngilluinartoq suliffeqarfissuup pisortanit pigineqartup pisortaanerata KNR-imit apersorneqarnermini isertuutinngilaa. 

- Piffissap ingerlanerani iluanaarutigineqartartut assingannik Royal Greenland iluanaaruteqaqqittussaagaluarpoq, Susanne Arfelt Rajamand oqarpoq: 

- Kalaallit Nunaannut pitsaaqutaasumik ingerlatsinissatsinnut kissaatigineqartut tunniussinnaajumallugit, pisoq uagut suliffeqarfimmi aqutsisutut aaqqinniartariaqarparput. 

2023-mut naatsorsuutit ukiup siulianut sanilliullugit ajornerupput. Coronap tuniluunnera ukiuni arlalinni sunniigaluartoq, aningaasat naleerukkiartoraluartut sorsuttoqaraluartorlu suliffeqarfissuaq 2022-mi sinneqartoorpoq.  

Sydamerika amigartoortitsivoq

Royal Greenlandip amigartooruteqarnera suliffeqarfissuup Sydamerikami Chilemi ingerlataanik peqquteqarpoq, taamaattumillu aamma naatsorsuutit 2022-miit 2023-mut allanngorujussuarput. 

Tassanimi aalisakkanik qalerualinnillu Asiamut tunisassiornissamut aningaasaliissutit aningaasaqarnikkut kinguneqarsimaqaat, Susanne Arfelt Rajamand oqarpoq. 

- Chilemi tunisassiat tamaasa Kinamut tunisinnaanissaat naatsorsuutigigaluarparput, akuersissulli utertinneqarmat kaaviaartitassatut naatsorsuutigut ilimagisatsitut inngillat. 

Suliffeqarfiup nunatsinniillunilu nunatsinnit pigineqartup Chiletut ungasitsigisumi ingerlataata amigartoortitsinera eqqumiigineqassappat, Royal Greenlandip pisortaanerata tupiginngilaa. Pigisalli nalillit siammartertariaqartarnerat pisariaqartartoq tikkuarpaa: 

- Nunani allani ingerlatagut isaatitsissutaajuaannartussaapput. Aalisarnerli allanngorartuuvoq, Kalaallit Nunaata isaatitassai qulakkeerniarlugit ingerlatat siammarneqartarput. Tamanna siunertaavoq.

Matusisoqarlunilu annikillisaasoqassaaq

Taamaakkaluartorli nunani allani ingerlatat sukaterivigineqassasut pisortaq eqqisssaavoq: 

- Taamaammallu aamma ingerlatagut tamaasa misissoqqissaarpagut, ingerlatallu ukiualunnit amerlanerusuni iluanaarutaasimanngitsut matuneqarnissaat annikillineqarnissaallu isumalugu. 

- Chilemi ingerlatatta 2024-mi iluanaarutaalluni ingerlateqqinnissaa anguniarlugu ukkatarinissaa aalajangiussimavarput, Susanne Arfelt Rajamand oqarpoq. Nunanilu allani ingerlatanik misissuinerup kingunerisaanik, Canadami aalisakkerivik ingerlatartik annaasaqarfiusoq matusimagitsik taassuma ilanngullugu oqaatigaa.  

Sukaterinissarlu pisortaanermit neriorsuutigineqaraluartoq Royal Greenlandip amigartooruteqarnera, inuiaqatigiit sinnerlugit piginnittunit Naalakkersuisunit maluginiarneqarpoq. 

Naatsorsuutit nassiunneqarnerata kinguninngua Naalakkersuisut siulittaasuata Múte B. Egedep (IA) "Chilemi amigaartorneq naammaginanngilluinnartuusoq" tusagassiutinut nalunaarummi oqaatigaa: 

- Taamaattumik naatsorsuutigaara Royal Greenlandip suliffeqarfik sapinngisamik piaarnerpaamik siumut aallarteqqissagaa aamma suliniutissat, nunani allani aningaasaliinernit sunnertianermik annikillisitsisussat, aallartissagai aammalu akiitsut annikillisinnissaat kiisalu Royal Greenlandip Kalaallit Nunaanni sulinerani aningaasaliinerit ukkatarissagai, siulittaasoq oqarpoq. 

Ernumanera malunnanngilaq

2023-mi amigartoorutit saniatigut Royal Greenland ukiuni kingullerni akiitsunikkiartuinnarluni maanna 3 milliardit koruunit ataatitsiarlugit akiitsoqarpoq.

Akiitsut amerlavallaarnerat suliffeqarfissuup nassueritigisinnaagaluarlugu, siunissami aalisarnermut aningaasaliinerummat siunertamut akilersinnaanera aamma oqaatigaa. 

 - Royal Greenlandip akiitsui amerlavallaarput, tamanna qularnanngilaq. Kisianni ingerlatatsinni aningaasartuutigut tamaasa nakkutigeqqissaarpagut. Akiitsoqarnerpulli aalisariutitsinnik siunissamut ukiuni 25-ni qulakkeerinermut atorneqarmata pingaaruteqaqaat.

- Akiitsugut ikilisikkiartussavagut, taamaaliornissatsinnullu ukiunut tulliuttunut pingasunut-sisamanut sukumiisumik pilersaaruteqarpugut. Aningaasaliinerli pingaartupilussuuvoq, Susanne Arfelt Rajamand oqarpoq. 

Akiitsut ikilisikkiartuaarnissaanut qanoq iliortoqarnissa Royal Greenlandip pisortaanerata sukumiinerusumik oqaatiginngilaa. Naatsorsuutinili amigaartooruteqartorujussuugaluarlutik akiitsorpassuaqaraluarlutillu, nunatta suliffeqarfissua sinnerlugu ernumassutissaqannginnerarpaa.  

- Pisoq malinnaavigeqqissaarparput tamanna qularutissaanngilaq aamma ernumanngilagut. Aningaasaqarnikkut imminut illersorsinnaasumik ingerlatsivugut, soorunalumi aamma tassunga ilutigitillugu pitsanngorsaaniarsaraluta.