Meeqqanut pilertortumik inissinneqartunut pissutsit ajorluinnartut KNR-ip ulluni kingullerni uppernarsarpai.

Meeqqat nunaqarfimmi Kapisilinni inissinneqarput, tassanilu takornarianut suliffeqarfiup Nuuk Outdoorip paarivai. 

Kommuneqarfiup Sermersuup tamanna ajornartoorluni aaqqiinermik taavaa, pappiaqqat meeqqat ataavartumik paarineqarlutik inissinnissaannut pisariaqartut suliariniarneranni. 

Naallu utaqqiisaagallartumik aaqqiinerusussaagaluartoq meeqqat ilaat illuaqqani oqorsarneqanngitsuni qaammatini qulingajanni najugaqarput. Nunaqarfimmiullu arlaqaqisut aserorterinernik, tillinniarnernik, ikittaatit gas-iinik naamaarnermik aamma ikuallatsitsinermik meeqqat nuummatali 'nalaataqarlutik oqaluttuarput. 

Nammineq takusaalluta illuaqqaneereeerluta sulisullu oqaloqatigeriartaraluarlugit naggataatigut angut isumassarsisoq – akisussaasorlu - Kenneth Thomsen sianerfigaarput.

Paaqqinniffiit arlaannaataluunniit meeqqat tigujumanngikkaat

Nuuk Outdoor 2021-mili ingerlappaa. Taamani takornariaannarnik sullissisuuvoq. Kisianni ukioq manna maajimiit suliani amerlivai meeqqallu inissinneqartut Kapisilinni paaralugit:

- Nuuk Outdoor takornariat sullinnerinut sammivoq. Meeqqalu ilaat - 18 sinnerlugit ukiullit – takornariat umiatsiamik angallannerinut assigisaannillu ikiuuttarput. Taamaalilluta takornariartitsinermut, aallaaniarnermut aamma aalisarnermut isertittarpavut, Kenneth Thomsen oqarpoq.

Nammineq isumaqarpoq pissusissamisoortoq nammineq suliffeqarfiutinilu toqqarneqarmata. Tassami inuusuttut naleqqussarsimanngitsut pillugit misilittagaqangaatsiarami, oqaluttuarpoq:

- Ukiuni kingullerni 10-ni maani Kalaallit Nunaanni meeqqanik paarsisarpunga, takusinnaallugulu meeqqat taakku 14-, 15-, 16-inik ukiullit paarsisussaqanngitsut. Ulloq unnuarlu paaqqinniffiit arlaannaataluunnit tigujumanngilaat, oqarpoq. 

Kisianni tassa Nuuk Outdoor taamaaliorumavoq. Aperigattalu eqqumiinnginnersoq takornarianik sullissisartoq meeqqanik pilertortumik inissitanik inuusuttunillu naleqqussarsimanngitsunik paarsisuutissallugit, erseqqissarpaa suliffeqarfiit taakku marluk assigiinngilluinnarmata:

- Toornaarsuk, massakkut mianersorniarit, tassami Nuuk Outdoor aamma ApS assigiingilluinnartut marluummata.

Nalaatsorluinnartumi assigiimmik atillit ataatsimillu piginnittullit? Paasilluarniaannarlugu.

- Aap, ApS aamma piginnittuuffigaara.

Assigiimmik ateqarput 2021-miillu takornarianik sullissisarfiuvoq. Taava 2023-mi kommunimi meeqqanik inissitanik paarsisalerpusi.

- Aap, tassa...Qanormaa ateqarpa? Tassami imaakkami isumaqaratta meeqqat qaammatini marlunni-pingasuni paaqqinniffimmik naleqquttumik inissinneqarnissaasa tungaannut paarissallugit. Piffissarlu taanna aallaaniarnermut aalisarnermullu atorparput, taavalu takornarialerinermut isertippavut. Qanormi iliortarneq tamaat pigigatsigu.

Uani aamma pingaaruteqarpoq erseqqissassallugu Nuuk Outdoor februaari 2021-miit suliffeqarfittut  inummit ataatsimit pigineqartutut nalunaarneqarsimammat, aamma Kenneth Thomsen manna tikillugu kisimiilluni suliffeqarfimmik piginnittuummat, taannalu sumut sammisuuneranik naluanaarsuiffimmi uani inissisimalluni: “Ilaasunik immakkut sinersorlunilu angallassineq”.

Kisianni Nuuk Outdoor ApS aatsaat aggusti 2023-mi pilersinneqarpoq – tassa meeqqat inissinneqartut Kapisilinnut illuaqqanut oqorsarneqanngitsunut angallanneqartarnerat qaammatit arlallit ingerlareersoq. Tamanna siullermik pivoq tusagassiutini Nuuk Outdoor siullermik allaaserineqatsiaannartoq, aamma ajornartorsiutit Nuuk Outdoor-ip piffissami sivikitsuinnarmi pilersissimasai pillugit nunaqarfimmi ataatsimiittoqariitsiaannartoq.

Inersimasunik maaniittoqarpa?

KNR-imut apeqqutit akineqaatigissallugit pingaarnerpaat ilagaat Kapisilinni meeqqanik pilertortumik inissitanik paarsisuutitat inersimasut qanoq ittuunersut.

Tassaapput meeqqat paaqqinniffiit sorliilluunniit tigujumanngissaat, Kenneth Thomsenip nammineq oqaluttuarnera naapertorlugu. Taamaattumillu aamma ilimagineqartariaqarpoq tassaasut meeqqat immikkorluinnaq pisariaqartitsisut, taamaattumillum aamma taakkuninnga sullissisut immikkut pisinnaasaqarlutik ilisimasaqartariaqarlutik.

- Sulisoqarpugut ulloq unnuarlu paaqqinniffinni assigiinngitsunik misilittagalinnik, Kenneth Thomsen oqarpoq.

Taakkunanngalu qassit meeqqanik paarsissallutik ilinniarsimasuuppat?

- Øøøh, ilami tassa, imaattunngilagut…ilumut meeqqerisunik pingasunik sulisoqarpugut, aamma ilinniartitsisut, inulerisut peqqissaasullu (social- og sundhedsassistenter), taavalu aamma suleqataasut ulloq unnuarlu paaqqinniffinni sulinermik misilittagaqartut.

Tassa tamarmik ulloq unnuarlu paaqqinniffinni sulinermik misilittagaqarput?

- Aap, isumaqarpunga marlunnik, imaluunniit taamaapajaartunik nutaamik aallartittunik ilinnialerlutillu peqarluta. Tassa misilittagalik ilagalugu.

Tassa imaappoq ulloq unnuarlu paaqqinniffinnit misisilittagaqanngitsut, kisianni massakkut ilinnialeraat meeqqat ulloq unnuarlu paaqqinniffinnut inissitat qanoq paarineqartarneri?

- Aap, taamatut oqarsinnaalluarputit.

Kenneth Thomsen oqaluttuarpoq suleqataasut katillugit qulingiluat missanniittut meeqqanik 12-nik paarsisut, aasarlu tamaat nunaqarfimmi najugarsimasut.

Taamaalilluni pingajorarterutaannangajaat meeqqanik paarsissallutik ilinniarsimasuupput. Sinnerisa misilittarpaat, imaluunniit massakkut ilinniarlugu.

Seqineq, aasaq iluatsitsinerlu

Kenneth Thomsenip nammineq Nuuk Outdoorip Kapisilinni aasarsiornera iluatsittutut oqaluttuaraa. Naak nunaqarfimmiut arlallit ikuallannernik, tillinniarnernik paaqqinniffimmiillu qimaanernik oqaluttuaraluartut. Aalajangiusimavaalu takornarianik sullissilluni suliffeqarfik ingerlalluartoq – naak amerlasuunik maalaaruteqartoqaraluartoq:

- Tassa taamatut oqaatigigukku soorunami sakkortuutut paasineqarsinnaavoq. Kisianni eqqarsaatigigaanni meeqqat qanoq ittuusut – qanoq ittunik ajornartorsiuteqartut – tassaavoq pinngitsoorneqarsinnaanngitsut. Taava meeqqat parnaarunneqartariaqarput, taamaaliorsinnaanngilagullu. 

Tassa meeqqat parnaarutinngikkaanni aserorterissapput, tillinniarlutik naamaarlutik ikuallaallutik qimaariarlutillu?

- Qimaariassapput. Tassami peersinneqarfii tassapput ilaatigut taasatit. Kisianni naassaanngitsumik toqqorneqartussaanngillat.

Novembari naalersoq niviarsiaqqat marluk umiatsiamik tillillutik Nuummut qimaariaraluarput. Tamatuma uppernarsarunarpaa meeqqat atugarissaanngitsuusut. Suli aalajangiusimaannarpiuk ataatsimut isigalugu meeqqat aasaq manna atugarissaarsimasut?

- Aap. Tamaappoq.

Suli qimaariartoqartarpoq. Imaannginnerluni ineqarfimminni atugarissaannginnamik?

- Kimmi-aa, naamivik taamanngivippoq. Tassaana imaakkami, silammukarumagamik pinerluttarnitik, ikinngutitik tamakkulu ornikkumagamikkit. Kommuni peqatigalugu manna suliaraarput. Kommunimi isumaqatigalugu ingerlatsivugut. Uagummi aalajangigarinngilarput kangerluup qinnguani toqqorneqassasut.

Kisiannimi suli imaannginnerluni – kommuniluunniit akuersisuugaluarpat – aamma illit akisussaaffigigit meeqqat taqqamaniittut ajunngitsumik atugassaqassasut pissutsillu ajunngitsuussasut?

- Aap. Aammami taamaappoq. Isumaqarpungalu arlaanni ilineqar...Meeqqammii ilaat mikisuarannguullutilli inissinneqarsimapput. Aningaasallu qanoq amerlatigisut kommunip inissiinernut atorsimannginnerpai, taavalu 16-17-inik ukioqaleramik iperarneqarput. Taamaalineranilu suut tamarmik sapanginneqartarput.

Aamma ilissinnut aningaasartuutaasimassapput?

- Naamik, taamaagunanngivippoq.

Illit ilisimassavat. Tassa, meeqqat taakku qanoq aningaasarsiutigaasigit?

- Kimmi-aa. taanna…ilisimasaqarfigissanngilat. Kommunimut apeqqutigisinnaavat.

Nuuk Outdoorip ajornartorsiutiginngilaa

Nunaqarfinnguami Kapisilinni innuit ilarpassuisa erseqqissarumavaat inuusuttut aasap ingerlanerani tikittut ajortumik eqqarsaatiginagit. Pingaarnermik misiginneqatigaat.

Arlallimmi oqaluttuarput pissutsit inuusuttunnguit inuuffigisaat isornarluinnartut. Naak aasap ingerlanerani illuaqqat pitsaanngorsarneqaraluartut. Eqqumiiginalaartumik tusagassiutini allaaserineqarnerisa nunaqarfimmilu innuttaasunik ataatsimiititsinerup kinguninnguatigut.

Taamaakkaluartoq nunaqarfimmiut meeqqanut pilertortumik inissitanut pissutsit Nuuk Outdoorip akisussaaffigisaasa qanoq ittuunerinik oqaatigisaat Kenneth Thomsenip isumaqatiginngilai. Ilutigalugu erseqqissarpaa taamallaat illuaqqanik Siumumit politikerimit Jens Kristian Berthelsenimit pigineqartunik attartorsimalluni:

- Kisiannimi, toornaarsuk, tassa Jens Berthelsenip taakku inuussutissarsiorluni atugassatut attartortippai. Tassami Jens Berthelsen aserfallatsaaliisussavoq. Kisianni tassa nammineq illuaqqat - imaluunniit illut – takusarpavut, toornaarsullu pitsaviupput, oqarpoq nangillunilu:

- Angalaarlutit Isumaginninnermik Aqutsisoqarfiup ílluaraatai, Nuummi 15-ugunartut takusarukkit. Misissukkit. Kimmi-aa, uku utaqqiisaaginnaapput. Taakkunaniittuaannartussanngillat. Kimmi-aa, mannami utaqqissaaginnaasumik aaqqiineruvoq. Maanimi aalajangersimasumik najugaqartuaannartussanngillat. Utaqqiisaasumik-una aaqqiineq, inissanik naleqquttunik nassaarnissap tungaanut.

Kisianni oqarputit ilaat maajimiilli tassani najugaqarsimasut. Taavami utaqqiisaaginnaasimanngilaq.

- Aap, kisianni uagut toornaarsuk ajornartorsiutiginngilarput. Isumaginninnermut oqartussat aqqutigalugit inissinneqarfissaasa nassarinissaasa tungaannut paarissavavut.

KNR-ip Jens Kristian Berthelsen oqaloqatigaa. Taassuma suliaq oqaaseqarfigerusunngilaa.

Aamma allat tamarmik perulluliorput

Tassami, naggaatigullu aamma meeqqat ajornartorsiutigaat. Taakkumi inuunerisa aallartinerat sakkortusimavoq, taavalu maanga pisarput najugaqarlutillu, oqarputillu allani suli ajornerusoqartoq…

- Naamik, naamik, taama oqanngilanga. Isumaqaannartungaana illuaqqat tamani tamaaniittut takussassagigisi.

Imaassinnaavoq taamaaliortunga, kisianni tassa ilissi illuararsi takusarpara. Illuliornermik ilisimasaqangaanngilanga, kisianni isumaliorpunga meeqqakka taqqamani najugaqassanngitsut.

- Tassami, kisianni manna utaqqiisaannaavoq. Taamaattumik... Taamaattumik... Taamaattumik pissutsit ajunngivipput, Kimmi-aa, Kenneth Thomsen oqarpoq nangillunilu:

- Massakkut Nuuk Outdoor ukioq naallugu pisuutitaavoq meeqqanik paaqqinniffiit nunaqarfinniittut taama annertutigisumik perulluliormata, tassalu toornaarsuk Nuuk Outdoor…hehe…

Inuit inuusuttut avammut qisuariartartut sullitaraatit – nammineq oqaluttuarnerit naapertorlugu. Arlaat perulluliorpat oqarlunilu alla takoqqullugu, taanna suli         perulluliornerummat, taava nassuiaat taanna akuerissaviuk?

- Naamerluinnaq, ila naamivik, taama oqanngivippunga. Oqanngilluinnarpunga allat assinginik naamaarnermik ajornartorsiuteqaramik aamma aserorterinermik ajornartorsiuteqartut. Tamannami ulloq unnuarlu paaqqinniffinnut meeqqanullu taakkununnga nalinginnaasuuvoq. Parnaaruttussaanngilavut Kenneth Thomsen oqarpoq naggataarutitullu erseqqissaalluni:

- Sullinniakkanik taakkuninngarpiaq suliaqarnerput tulluusimaarutigaara.