KNR-imit ulluni makkunani nangeqattaartutut ilillugu, Kommuneqarfik Sermersuup ukiup 2023-ip annersaani takornarialerinermik suliallit meeqqanik kommunip angerlarsimaffiup avataanut inissitaanik nakkutiginnittunngortissimagaat,. sammivarput.

Kommunip meeqqat pillugit pappialarsornerup nalaani, sumut aalajangersimasumik inissinneqarnissaata paasiniarnerani ajornartoornermi, inissiinertik aaqqiissutaagallartutut taavaat.

Naallu aaqqissutaagallarnerugaluartoq, meeqqat ilaat Nuup Kangerluata qinnguani nunaqarfimmi Kapisilinni, illuaqqani oqorsaasersugaanngitsuni – ilaquttatik ikinngutitillu ungasillugit - maannamut qaammatini qulini najugaqartinneqarput.

Nunaqarfimmiut arlallit meeqqat toqqissisimarpasinngeqisut oqaluttuaraat – ilaananngitsut. Aserorterinerit, tillinniarnerit, ikittaatit gassiinik naamaarniarnerit allaallu ikuallatsitsinerit, aasap ingerlanerana Kapisilinni pisut ilamininnguarai.

Suliffeqarfiup avataaneersup isumassarsiatsialaa

KNR-iminngaanniit tusarusupparput, kommunimi kikkut takornarialerisut meeqqanik angerlarsimaffiup avataanut inissittarialinnik paarsisussatut takornarialerisut aalajangersimaneraat. Severin Berg, Kommuneqarfik Sermersuumi meeqqanut ilaqutariinnullu immikkoortortami pisortaagallartuusoq septembarimi apersorparput.

- Ilaanni periarfissat takkuteriataartarput. Eqqaamanerlunngikkukku taakku namminneq (Nuuk Outdoor, aaqq.) kommunimut saaffiginnipput, oqarlutik suliniummik aallartitsinialersaarlutik. Aperaatigut soqutigisinnaaneripput. Taama pisortaqatigiit suliniutiginiagaq pillugu oqaloqatigaavut, oqarpoq.

Pisortaqatigiit, meeqqat angerlarsimaffimmiit peersitat takornarialerisunit nakkutigineqarnissaat, eqqumiiginartinngilaat?

- Oqaloqatigiissutigaarput, isumaqataasoqarpoq isumaqataanngitsoqarlunilu. Takornarialerisuunerat soqutiginngilarput. Meeqqat paaqqutarineqartut qanoq isumagineqarnissaannik nassuiaatit soqutiginerugatsigit.

Avataaniit isiginnittuuttuni eqqumiiginalaarpoq. Arlaannassiluunniit ilumut apeqqusinngilaa akueriniakkassi takornarialerisuunerat?

- Ilaanni allatut ajornartumik, siunnersuut ajortoq imaluunniit siunnersuut ajornerulaartoq toqqassanerlutigu aalajangiisariaqartarpugut. Taamanilu ilisimatinneqareerpunga Nuuk Outdoorikkut suliniut meeqqanut tunngasoq aamma takornarialerinermik sulineq immikkoortinniaraat, Severin Berg oqarpoq.

Angut isumassarsialik 

Suliniummi isumassarsisoq – suliffeqarfimmillu piginnittoq tassaavoq Kenneth Thomsen. Nammineq inunnik isumaginnittoqarfimmi sulisuusimavoq. Tassani Pinaveersaartitsineq pillugu Aqutsisoqarfimmi aamma Isumaginninnermut allattoqarfimmi, kommunimi ulloq unnuarlu najugaqarfinnik isumaginnittoqarfiata immikkoortortaani pisortaasimavoq.

- Kalaallit Nunaanniinninni meeqqanik ukiuni kingullerni qulini paarsisareerpunga, taamaammat aamma takusareerparput meeqqat 14, 15 aamma 16-inik ukiullit najugaqarfinniit isumagineqarusunneq ajortut, KNR-imut oqarpoq.

Taamaammat atorfimminut naleqquttuusoq isumaqartoqarsinnaavoq. Takornarialerisutulliuna suliffeqarfini neqitsiullugu taamaaliortoq. Aalajangiisussammi tassaapput Kenneth Thomsenip suliffigisimasaani sulisut, taakkulu Kenneth Thomsenip Nuuk Outdoorillu meeqqanik isumaginnissinnaanerat toqqarpaat.

Qanorluunniimmi oqartoqaraluarpat Nuuk Outdoorip, kommunimut neriorsuinini malillugu meeqqat toqqissisimasumik avatangiiseqartissimanngilai.

Aamma suli maannamut Nuuk Outdoorip ulloq unnuarlu najugaqarfittut akuerineqarnissaa, Isumaginninnermut Aqutsisoqarfimmut qinnuteqaataa, arlaleriarlutik allagaqartaraluarlutik suli iluatsinngilaat, qinnuteqartuarpulli.

Pisimasummi takutippaat takornarialerisuulluni meeqqanik angerlarsimaffimminnit peersitanik nakutiginninneq ajornaatsuinnaanngitsoq.

Severin Berg KNR-imit paasisatsinnik  Nuuk Outdoorip meeqqanik Kapisilinniititsinera aasaq iluatsissimarpasinngitsoq pillugu saqqummiivigigatsinni ima akivoq.

- Nakkutiginninnerinut atatillugu nalunaarutisinikuuvugut. Isumaqarpungattaaq, nunaqarfimmiunit aamma allagarsilluta. Inissitatta ilai ajunngillat ilaalli suli unamminartorsiorput, oqarpoq.

Pisoq kisimiinngilaq

Meeqqat unamminartorsiornerannik oqassalluni, Kapisilinni aasaq pisut eqqarsaatigissagaanni oqaaseq sakkukippallaarsorinarporluuniit. Taamaattumik Severin Berg aperaarput, meeqqat aasarsiorluarsimanersut nalunnginneraa.

- Ilumoorputit, meeqqat toqqissisimarpalunngillat. Kisianni ajornartorsiut taanna Nuuk Outdoorip kisimi ajornartorsiutiginngilaa. Ulloq unnuarlu najugaqarfinni amerlasuuni assinginik ajornartorsiuteqarpugut, oqarpoq.

Uanili erseqqissaatigineqartariaqarpoq Nuuk Outdoor ulloq unnuarlu najugaqarfittut akuerisaanikuunngimmat, naak Severin Berg - oqartooraluarnerluni – suliffeqarfik ulloq unnuarlu najugaqarfittut taagaluaraa. 

Ulloq unnuarlu angerlarsimaffiugaluarpammi nakkutigeqqissaarneqassagaluarpoq, aamma meeqqat angerlarsimaffimminninngaanniit peersitat qanoq paaqqutarissaneraat malittarisassaqassaluarluni, illoqarfitsimmi qimallugu ikinngutit ilaquttallu qimallugit matumani eqqartukkatsinni kangerluliartarput. 

Najukkanut tunngatillugu aamma malittarisassaqassagaluarpoq, aamma inersimasut paaqqutarinnittussat pillugit malittarisassaqassagaluarluni.

Kisianni takornarialerisut takornarialerisuupput ulloq unnuarlu angerlarsimaffiunatik. Taamaammat malittarisassaqanngilaq. Takornarialerisummi namminnerluinnaq aalajangersinnaavaa kommunip meeqqat inissitai, qanoq pissanerlugit – uani aamma kommuni akuersisimanermikkut akisussaasuugaluartoq.

Qanorlu sivisutigisumik taama pissanerlugit namminneq aalajangersinnaavaat. 

Nunarsuarmi pitsaanerpaaq

Nuuk Outdoor meeqqanik nakkutiginnittuutiinnarniarpisiuk?

- Ilaanni aappimik naamimilluunniit akiuminaattarpoq. Oqaatigereerpara, meeqqat 15-it maanna taakkunannga nakkutigineqartut pillugit aaqqiissutinik pitsaalluinnartunik naammassiniagaqarpugut. Meeqqanik paaqqutarinninnermik ilinniarsimasunik suleqateqarluta suliniutit ataasiakkaat, taakku suleqatigalugit, pitsaanerulersinniarlugit suliniuteqarpugut, Severin Berg oqarpoq. (Taassuma septembarimi apersorneqarnerata kingorna kisitsit allanngorsimavoq: Meeqqat maanna arfinillit Nuuk Outdoorimiittut, kommunip KNR-imut ullumi paasissutissiissutigaa aaqq).

Inunnimmi Isumaginninnermik Aqutsisoqarfiup ulloq unnuarlu angerlarsimaffinngornissamik suliffeqarfiup qinnuteqaataa itigartissappagu, taava qanoq iliussavisi?

- Akisinnaanngilakkit. Kisianni suliffeqarfik ulloq unnuarlu angerlarsimaffittut akuerineqanngippat, piumasaqaatit naammannginnerat pillugu, soorunami meeqqanik inissiiffigiuminaassaaq, Severin Berg oqarpoq. 

Sooruna erseqqissumik apeqqut taanna akisinnaanngiliuk?

- Ilami suliniummut atatillugu akuerineqanngitsut suli ullumikkut suli suleqatigigatsigit. Akuerineqanngippata inissiiffigiuminaassaqaat.

- Tassami, nunarsuaq pitsaanerpaaq najugarigaluarutsigu, Nuuk Outdoor meeqqanik nakkutiginnittuutissanngikkarluarparput, Severin Berg naggasiivoq.