Kapisillit nunaqarfiuvoq mikisoq, Nuumminngaanniit angallammik akunnerni marlunni ungasitsigivoq. Naliginnaasumik nunaqarfimmi najugaqartut 50-it sinnilaarlugit najugaqartarput, ukioq mannali najugaqartut 15-it missaannik amerlipput. Takornarialerisut Nuuk Outdoorip nunaqarfimmi illut pingasut attartorpai, tassanilu meeqqat inissikkasuakkat maajimili paaqqutaralugit.

Nunaqarfeeqqami eqqissisimannginnermik toqqissisimannginnermillu tamanna kinguneqarpoq.

Taamaattumik pissutsit piviusuunersut uppernarsarniarlugit decembarip aallartinnerani Kapisilinnukarpugut, tassanilu najugaqartut 2023-mi nunaqqatitaatik qanoq misigisaqarfigisimaneraat paasiniarparput.

Toqqissisimanannginnerup iserternera

Tulattarfik qanilliartornerani nunaqarfiup qaamanera juullimi pinnersaatitut isikkoqarpoq. 17-inik issippoq. Aalisartoq saarullinnik nutaanik nerpiiaavoq. Ikaartarfik tummarlugu issinneranut qeraarpalaartarpoq, aalisakkallu niaqui erlaviilu immamut tungujoqisumut iginnerani serpartarput. Sikiimilluni isiminik ilassivoq.

Nalunaaqutaq aqqarnup qeqqarpoq. Kapisillit inoqanngingajaavippoq, illut imminnut qaninngillat akornanilu containereqaaluppoq qulliillu sakkukipput, traktoreqarpoq, taakkualu nunaqarfiup inoqarneranik takussutissipput.

Nunaqarfiup allaffiani nunaqarfimmi siulersuisuni ilaasortaq issiavimminut ingilluartitaarsimalluni silamiissimaneranut uluai sinngualaaqqapput. Timaata oqaluttuarneratigut Nuuk Outdoorikkut qanoq isumaqarfiginerai takuneqarsinnaavoq:

-Nunaqarfimmiuusugut meeqqanik eqqunngitsumik iliortunik takusaqaraangatta oqaaseqarfigikkajuttarpagut, taamaattumik meeqqanut paaqqinnittut perorsaaqatigipajaartarpagut maani isigisagut malillugit, Angutimmarik Hansen oqarpoq.

Nunaqarfimmi najugaqartut arlallit aasap ingerlanerani nunaqarfimmi mikeqisumi eqqissiviittoqarnera toqqissisimanartinngikkaat taanna oqaluttuarpoq:

-Innuttaasut ilaasa misigaat eqqaminni ikuallaasoqarnikuuneq angallataasalu aallarunneqartarneri, arlaannik ajortorujussuarmik pisoqarpat uani innuttaasunut annertuumik artukkiissasoq ilimagivarput. Serlersaarinerit sakkortulaartunillu iliortoqartarneri tassani ernumassutitsinni annerpaavoq, taanna oqarpoq.

Illuaraq pueqqertoq oqorsaatailu masattut

Nunaqarfiup allaffeqarfiata quleerannguani Nuuk Outdoorikkut illuaraq attartugaat ataaseq inissisimavoq. Tassani meeqqat inissikkasuakkat qaammatini arlalinni najugaqarput.

Illuaraq taanna 60 kvadratmeterip missaannik angitigivoq, suli sanaartorfigineqartutut isikkoqarpoq, soorlu suliarinera suli naammassinagu qimaannagaq.

Illuaqqap silatinnguani qisuit pallellu qaleriissaaqqasut apummik qallerneqarsimapput, tamanna illuaraq qanittumi suliarineqarsimaneranut takussutissaavoq – nunaqarfimmilu najugaqartut arlallit KNR-imut tamanna uppernarsarpaat.

Illuaraq takugaanni qanittumi pitsanngorsarneqarsimasoq upperiuminaassinnaagaluartoq, nunaqarfimmi pissutsit kommunimut naammagittaalliutigineqareersullu, Nuuk Outdoorikkullu pillugit ataatsimiittoqareernerata kingorna illuaraq aasap ingerlanerani pitsanngorsarneqarsimavoq.

Pitsanngorsaanerillu suli naammasseqqajanngillat. Qisuit saasut igalaanut, iikkanut, illup allissutaanut ikuallattoqalissappallu majuartarfinnut atorneqarsimapput. Illup oqorsaataata ilaat iluamik asseqanngillat taamaattumillu masallutik.

Illuaraq inigineqarnissaanut tulluanngilaq. Taamaattorli meeqqanut inissikkasuakkanut upernaarli inigitinneqarpoq. Ukiallu sinnera tassaniissallutik.

Assi © : Kim Hinrichsen/ KNR

Pissutsilli qanoq innersut, illup ilualu qanoq isikkoqarnersoq paasiniarlugu matukkut kasuttorfigaagut.

“Kialaap” iluani

Paamut anginngitsumut torsuusaallunilu igaffiutigisumut isertinneqarpugut. Saamimmi ini anginngitsumi nalaasaarfeqarpoq, nerrivik, fjernsyni aammalu kiassaat supoortoq. Nalaasaarfimmi angut niuni qaqillugit oqarasuaamminik oqaluussivoq. Ilassinngilaatigut, taamaattorli oqaluussani nipikitsumik oqaluutiutigalugu nakkutigivaatigut.

Talerpimmi anginngitsumik nerisarfeqarpoq. Nerrivimmi meeqqat marluk aqqaneq marluk missaannik ukioqarpasittut Coco Popsitorput.

Oqarasuaatikkut nipikitsumik suli oqaluussisoqarnerani nerisarfimmi utaqqivugut. Illuaqqap ilua silaannaalu nillerput. Sulisut ilaat arlaleriarluni erseqqissaavoq – taamaattorli ajornartorsiutip qanoq aaqqiiviginissaanut nassuiaateqaranilu taasaqarani.

Arnaq illuaqqamut isertitsisoq isikkivik pillugu oqaloqatigilaarparput, nunaqarfiup isikkiviginnerpaartarinerarpaa – oqaloqatigilaareerlutigulu sulisut oqaloqatigeqqusaanngikkivut paasitinneqarpugut aneqquneqarlutalu.

Meeqqanut ingammik qajannartoq

Anigatta Lone Nikolajsen Hansen aqqusinermi naapipparput, Nuuk Outdoorikkullu tikinneraniit nunaqarfeeqqami qanoq misigisaqarsimanerluni oqaluttuaraa:

-Innuttaasut maani amerlannginnatta, arlaannik qanoq pisoqassagaluarpat assaat piareersimasut eqqarsaatigigalugit tulluartinngilara maaniinnerat, taanna oqarpoq nangillunilu:

- Imaanngittoq tikilluaqqunnginnakkit kisianni sillimaniarneq eqqarsaatigalugu taamatut isumaqarpunga, Lone Nikolajsen oqarpoq.

Allaffimmi aporaanneq

Nunaqarfiup allaffianut uteqqikkatta angut matukkut iseriasaarpoq. Suminngaanneernersugut siullertut aperivoq, akigattalu atigut piumavai allattaaveeqqaminullu allattulerlugit. Atigut piumanerinut suna siunertarinerlugu akiumanngilaq.

Angut taanna KNR-ip sulisuanut kiinaata saaffaarianut pilluni KNR-ikkut sooq Kapisilinnukarsimanersut, illuaqqamilu sussanersugut apersulerpaa. Tassani kavaajaa Nuuk Outdoorimik allaqqasortaqartoq maluginialersimavarput.

Meeqqat nunaqarfimmi qanoq innersut paasiniarlugu tikinnitsinnut tunngaveqartoq oqaluttuupparput, meeqqallu ajunnginnerpaamik atugaqartinneqanngitsut taanna oqarpoq. Meeqqallu taakku sumut allamut inissinneqassanersut kommunip nalugaa erseqqissaavoq. Pisortaminiillu qanoq ilioqquneqarnini malikkinni oqaatigeriarlugu tuaviinnaq allaffimmiit aniartorpoq.

Nunaqarfimmi meeqqat inissikkasuakkat pillugit ajornartorsiutit nunaqarfimmi najugaqartunit ataatsimiissutigineqareernerata kingorna Nuuk Outdoorimi sulisut nunaqarfimmiunut sioorasaarisutut pissuseqartarsimasut nunaqarfimmiunit arlalinniit oqaatigineqareerpoq.

Meeqqat Pilersuisumi sulisarput

Nuuk Outdoorikkut illuaraataata ilaat Pilersuisusup eqqaani inissisimavoq. Illuaqqap silataani angutit pingasut suliffeqarfiup ilisarnaataanik ilisarnaaserneqarsimasunik kavaajaqarlutik nikorfapput. Angut ataaseq nunaqarfiup allaffiani naapinnikuusarput nikorfaqataavoq.

Pisiniarfimmut iseratta niuertitsisoq Inger Lukassen naapipparput, Nuuk Outdoorikkullu meeqqat paaqqutarisaat pisiniarfimmi sulisunit nalunnginneqartut oqaluttuarpoq:

- Nuuk Outdooriminngaanneersut meeqqat atuarneq ajoramik, taava sulisui Pilersuisumut saaffiginninnikuupput meeqqat ikiuuttarsinnaanersut aperiartorlutik, taannalu iluatsinnikuuvoq, ullut tamaasa aggerneq ajorput, meeqqalli piumassusertik aallaavigalugu isertarput, Inger Lukassen oqarpoq nangillunilu:

- Nioqqutissanik ilioraallutillu torersaasarput, tamanna uagutsinnut iluartaqaaq pikkorittaqaallu.

Pilersuisup silataani ukiuni qulikkuutaani nunaqarfimmi najugaqarsimasoq Jacob Josefsen naapipparput:

- Maani eqqissisimasumi nunaqarfimmi perulluliortoqartalernera soorunami tupassutigaarput, taamaaliorfigineqarnermi ajoratta maani, taama oqarpoq nangillunilu:

- Nakkutigineqarluartarnissaat nunaqqataasunit piumasarineqaraluarpoq aamma malunnarpoq taamatut isumaqartugut.