Takornarialerisut meeqqanik nakkutigisarialinnik paarsisut. Ila soorluuna ilumoorsinnaanngitsoq. Taamaakkaluartoq ilumoorluinnartuuvoq, tamannami Kommuneqarfik Sermersuumi pivoq.

Kommunip meeqqanut ingerlaannartumik najugaanniit allamut inissittarialinnik inissiiffissaalatsitsineranik pissuteqartoq, immikkoortortami pisortaq Severin Berg nassuiaavoq:

- Suliat ilaanni – ingerlaannartumik inissiiffissaqartitsinnginneq pillugu allatut ajornartumik suliniuteqarnermik aallutaqareersunik – atuisariaqartarpugut, oqarpoq nangillunilu:

- Allatut ajornavikkaangalli naggataagut aatsaat taama aalajangersinnaasariaqartarpugut. Taamammi aaqqiineq meeqqanut atatillugu aaqqiissutissatut tamatigut naleqquttuuneq ajorpoq, oqarpoq. 

Taama oqarneq sakkukippallaarporluunniit, tassami takornarialerisartut meeqqanik isumaginninnerisa nalaanni innuttaasut ernumasut angajoqqaallu erloqisut nalunaarutaat arlaqarsimaqaat.

Angallassineq meeqqanillu paarsineq

Suliffeqarfik, Nuuk Outdoorimik atilik, Facebookimi ima imminnut ilisaritipput:  

“Uagut “atuaqatigiinni nutaartaavugut” tassaallutalu Nuummi misigisassarsiorlniartunik takornarialerisut. Kikkulluunniit angisoorsuuppata mikisunnguuppata apeqqutaatinnagu puigunaatsunik pinngortitami avatangiisitsinni pinneqisumi puigassarinngisaannik misigitissallugit siunertaraarput.” (FB-OPSLAG)

Nuuk Outdoor,  Nuummi eqqaanilu 2021-mili takornariartitsisalerput, ilaatigut arfernik takusassarsiorluni angalassineq, tuperiartitsineq, aavariartitsineq  aamma kangerlummut aalisariartitsineq suliarisarlugit. 

Kisianni 2023-ip aasaanili suliatik amerlillugit, meeqqanik angerlarsimaffimmit aarsaarinnissutaasunik Kapisililiaassisalerput, tassanilu sapaatit akunnerini arlalinni najugaqatigisarlugit – ilaanni qaammataalunni. Illuaqqani, innuttaasut pigisaanni attartukkani.

Ajoqut pisariaqartorli

Aaqqissuussineq taamaattoq ulloq unnuarlu angerlarsimaffittut isigisassaanngimmat isumaginninnermut naalakkersuisoqarfik imaluunniit isumaginninneq pillugu nakkutilliisoqarfik pisunik malinnaatinneqanngillat, kommunip taama aaqqissuussineq ”suliniutaagallartutut” taasimammagu. 

Taamaalilluni aamma kommunip meeqqat kimit paarineqarnersut ilisimanngilaa. Taama Kommuneqarfik Sermersuumi Meeqqanut Ilaqutariinnullu immikkoortortaqarfimmi pisortaq Severin Berg oqarpoq: 

- Nuuk Outdoorimi sulisuusut sumik ilinniaqarsimanerat sulit allattorsimaffiannik peqannginnama ilisimanngilakka. Nammineq ilissi attavigisariaqassavasi, paasiniarlugu sinaakkutit suut tunngavigerpiarlugit sulinersut, oqarpoq nangillunilu:

- Nalunngilara, arlallit perorsaasutut ilinniagaqaratik allanik ilinniagaliusut. Kisianni takornarialerisut taakkuunngillat meeqqanik paaqqutarinnittut, eqqarsarpunga. 

Ilisimarpianngilarali, Meeqqanut Ilaqutariinnermullu immikkoortortami pisortaq oqarpoq, taamaammat aamma qulakkeerlugu oqaatigisinnaanngilaa kangerlummut takornariartitsisartut aamma tassaanersut meeqqanut angerlarsimaffiup avataanut inissitanut akisussaassuseqartumik paaqqinnittut. 

Severin Bergip aaqqiigallarnertut suliniut isigaa – ajoqut pisariaqartorli:

- Utaqqiisaasumik suliniummut inissiigallartariaqartarpugut, aalajangersimasumik meeqqap inissinneqarfigisinnaasaanik nassaarnissatta tungaanut, oqarpoq nangillunilu.

- Periusissatut pilersaarutip suliarinerani aamma isumaginninnikkut meeqqap qanoq nalilerneqarnerata misissornerani meeqqap piffissami aalajangersimasumi najugarigallarsinnaasaanik nassaarniartariaqartarpugut, oqarpoq.

Meeqqat, ikullanneq, eqqissiviilliorneq nunaqarfimmiinnerlu 

Eqqortumik oqassagaanni, Kapisilinni najugaqavissuinnaat kisimik kommunimut nalunaaruteqartarsimanngillat. 

Nunaqarfimmiut atsiornernik katersuisitsisimapput, innuttaasunik ataatsimiisitsisimallutik aamma kinguillertigut taqqamani illuaraatillit kommunimut ima ilaatigut nassuiaatitalimmik allagaqarsimapput:

“Arlalinnik nalaataqarpugut, soorlu gasinik naamaannerit, ikuallatsitsinerit, aserorterinerit, tillinniarnerit aamma meeqqat qimarrattut. Qanoq aamma inuusuttuaqqanik Kapisilinnut inissiisoqassava, Nuummi innuttaasut, nunaqarfimmiut aamma illuaraatillit tusarniaaffigeqqaarnagit? Kikkut paarsisuuppat? Sulerisassappat? Sumi najugaqassappat? Kimit nakkutigineqassappat?”

KNR-ip Kapisilinni illuaraatilimmik apersuinermini paasivaa, taassuma gummibådia meeqqat aallarunnikuusimagaat sequmillugulu, illuaraat ikuallatseriarneqarsigaat, aamma nunaqarfimmiikkaangamik toqqissisimasanngillat, meeqqat angerlarsimaffimminniit peersitat nunaqarfimmi nakkutigineqaratik sumi tamaani angalaaginnaleraangata. 

Illuaraatillip Nuuk Outdoorip sulisui saaffigigaluaraangamigit, sulisut meeqqat uffa akisussaaffitik – sumiissi´manerat sulerisimanerallu ilisimasanngilaat. 

Nunaqarfimmiut aamma oqaluttuaraat, meeqqat illuaraaraaqqani, oqorsagaanngitsuni najugaqartinneqartut. Illuaraq ikuallattoqassagaluarpat annaassiniarnermi majuartarfiit atugassat spånpladiinnarnik suliaapput, majuartarfiit igalaap silatinnguanut inissitaallutik. Illuaqqami quleriinnik marlunnik siniffeqarpoq meeqqanut arfineq-pingasunut piffissap ilaani atugassanik.

Najugaq tassaasussaagaluarpoq kommunip meeqqanut angerlarsimaffimmit peeritaasunut toqqissisimatitsiffissaq.  

Pappiarat torinngitsut

Ajornartorsiut – soorlu KNR-imit  siornatigut oqaluttuarereeripput – kommunimiittartoq tassaagajuppoq meeqqap angerlarsimaffimminit allamut nuutsinnissaanut atatillugu aalajangiinerit allaganngorlugit takussutissartaqartannginnerat aamma paasissutissanik peqanngittarnera. Soorlu Kommuneqarfik Sermersuumi pissutsit aamma taamaattut. 

Meeqqap angerlarsimaffimminit peersinneqarnissaanik kommunimit aalajangiisoqareeraangat sumut inissinnissaanik aalajangiinissamut atatillugu Isumaginninnermut Aqutsisoqarfik paasissutissanik pinngitsoorani pisussaavoq:

Taama oqartoq tassaavoq Isumaginninnermut Aqutsisoqarfimmi pisortaaneq Tina Evaldsen: 

- Kommuni, meeqqap qanoq pineqarnissaanik, aalajangiisuuvoq. Taamaammat isumaginninnikkut meeqqap qanoq nalilerneqarneranik misissuineq naammassimanngippat imaluunniit periusissatut pilersaarusiaq amigaataappat, suliaq aalajangiiffigigssagutsigu taakku suliarineqarsimanissaat piumasaqaatigisarparput, oqarpoq. 

Aalajangiinissap tungaanut kommuni ??? -gallassaaq. Kisiannili aaqqiissutissap suuneranik piumasaqaateqartoqartanngilaq – aaqqiigallartoqartallu kommuni kisimi nakkutilliisuusinnaavoq, allaanngitsut. 

- Meeqqap nuutsitaanissaanut atatillugu akisussaaffik annerpaaq kommunimiippoq, Tina Evalden oqarpoq.

Pisumi matumani Kommuneqarfik Sermersuup Nuuk Outdoor meeqqanik isumaginnittussatut toqqarsimavaa. 

Severin Bergip nassuerutigaa aaqqiineq pitsaanerpaanngitsoq. Ilanngitsoq. Kisianniuna suliap aallartinneraniit aalajangiinissap tungaanut suliaq sivitsoruttoorsinnaasarnera, ukiuni arlalinni taamaattuarsimasoq, oqarpoq: 

- Periuseq atorniagarput periarfissat kingullersarisarpaat. Ajornartorsiut nutaajunngilaq. Kommunimi suliaq taanna sivisoorujussuarmik ajornartorsiutigaarput. Taamaammat aaqqiissutaagallartutut Nuuk Outdoor maanna atortariaqarsimavarput.

Angut isumassarsialik 

Nuuk Outdoor-ip meeqqanik angerlarsimaffiup avataanut erngertumik allamut inissittarialinnik isumaginninnissamik isuma kommunip isumassarsiarinngilaa – suliffeqarfiup nammineq isumassarsiaraa, tassa taanna suliamut atatillugu soqutiginartua, Severin Berg oqaluttuarpoq: 

- Ilami, periarfissammi ilaanni takkuteriataartaramik. Isumaqarluinnarpunga, suliffeqarfik nammineq kommunip saaffiginneqqaartuusut, nutaamik suliniuteqarniarnerminnik isuma saqqummiullugu, aperiartuutigalutik uagutsinnut soqutiginassanersoq. Taamanilu ulluinnarni aqutsisuvut suliniuteqalersaarneq pillugu oqaloqatigisalerpavut.

Ulluinnarni aqutsisussi takornarialerisut meeqqat angerlarsimaffimminniit peersitanik paarsisalerniarnerat eqqumiigilaanngilaat?

- Oqaloqatigiissutigaarput, kisianni oqallinnerni akerliusoqarlunilu tapersiisoqartuaannartarpoq. Takornarialerinertaa uatsinnut soqutaavallaanngilaq. Uagutsinnut soqutinartortaa meeqqat tamarmik immikkut qanoq ililluni ikiorserneqarnissaannik tamanut paasiuminartumik nassuiaataata imarisaaniippoq. 

Avataaniit aggersuulluni eqqumiiginarsinnaavoq. Takornarialerisut paarsisussatut toqqartussanngorassigit eqqarsaqqiffeqalaanngilasi? 

- Ilaannimi allatut ajornartumik – aalajangiinernik ajorsorinarsinnaasunik imaluunniit ajornerulaarsorinarsinnaasunik toqqaasariaqalertarpugut. Nalunngilara Nuuk Outdoorip sulinerminni suliniut meeqqanut tunngasoq aamma takornarialerineq immikkoortinniarsarigaat. 

Suliniummi isumassarsisoq – suliffeqarfimmillu piginnittoq tassaavoq Kenneth Thomsen. Nammineq inunnik isumaginnittoqarfimmi sulisuusimavoq. Tassami Pinaversaartitsineq pillugu Aqutsisoqarfimmi aamma Isumaginninnermut allattoqarfimmi, kommunimi ulloq unnuarlu angerlarsimaffinnik isumaginnittoqarfimmi ukiuni ?-? immikkoortortami pisortaasimavoq. 

Taamaammat isumaqartoqarsinnaavoq, atorfimminut naleqquttuusoq. Takornarialerisutulliuna suliffeqarfini neqitsiullugu taamaaliortoq. Aamma isumaqartoqarsinnaavoq, suliniummik siunnersuutaanik naliliillutik inuit aalajangiisussat inuttut ilisimasarereersimassagai – taamaammallu ilumut isumagisarialinnik sullissisinnaanersoq imaluunniit sullissisinnaannginnersoq apeqqusernagu naliliisussat ilisarisimaneri piinnarlugu akuerineqarsimanersoq apeqqusernarsivoq. 

Tassami paasinarsivoq Kenneth Thomsen aamma Nuuk Outdoor, kommunimut neriorsuinertik eqquutsissinnaasimanngilaat, tassalu meeqqat toqqissisimasumik angerlarsimaffeqartinnissaat.  

Nuuk Outdoor Isumaginninnermut Aqutsisoqarfimmut ulloq unnuarlu angerlarsimaffittut akuerineqarnissaminnik qinnuteqarsimapput, sulilu qinnuteqartaraluarlutik, maannamut iluatsitsinatik. 

Imaaliallaannaq takornarialerisuulluni meeqqat angerlarsimaffimmit peersitat isumaginissaat ajornaatsuinnaasimannginnera arlalinnik takussutissaqarpoq. 

Severin Bergip tamanna KNR-imut nassuerutigaa, pingaartumik eqqarsaatigalugu meeqqat angerlarsimaffimminnit peersitat Nuuk Outdoorip aasarli Kapisilinniitai pillugit tusakkat nalilersoreerlugit: 

- Nakkutigisagut pillugit susoqarsimaneranik nalunaarutisivugut, aamma isumaqarluinnarpunga nunaqarfimmiunit nalunaarutisilluta. Meeqqat ilaat ajunngillat, kisianni atugaat pitsaavinngillat, oqarpoq.

Nunarsuarni tamani pitsaanersaq

Severin Berg paasisatsinnik saqqummiivigigatsinni nassuerutigaa, meeqqat kangerluup qinnguani nunaqarfimmiinnerminni toqqissisimarpasinngitsut: 

-Ilumoorputit, meeqqat toqqisisimarpasinngillat. Tamannali Nuuk Outdoorip kisimi ajornartorsiutiginngilaat. Ulloq unnuarlu angerlarsimaffinni allarpassuarni arlalissuarnik ajornartorsiuteqarpugut, oqarpoq.

Nuuk Outdoor ullo unnuarlu angerlarsimaffittut suli akuerineqarsimannginnera uani eqqaasitsissutigisariaqarpoq. Naak Severin Bergip – kukkuneq imaluunniit oqartoorneq pillugu – suliffeqarfik ulloq unnuarlu angerlarsimaffittut taagaluaraa. 

Ulloq unnuarlu angerlarsimaffiugaluarpammi nakkutigeqqissaarneqassagaluarpoq, aamma meeqqat angerlarsimaffimminninngaanniit peersitat qanoq paaqqutarissaneraat malittarisassaqassaluarluni, illoqarfitsimmi qimallugu ikinngutit ilaquttallu qimallugit kangerluliartarput. 

Najukkanut tunngatillugu aamma malittarisassaqassagaluarpoq. Aamma inersimasut paaqqutarinnittussat pillugit malittarisassaqassaluarpoq.

Kisianni takornarialerisut takornarialerisuupput ulloq unnuarlu angerlarsimaffiunatik. Taamaammat malittarisassaqanngilaq. Takornarialerisummi namminnerluinnaq aalajangersinnaavaa – uani aamma kommuni akuersisimanermikkut akisussaasutut – kommunip meeqqat inissitai, qanoq pissanerlugit.

Qanorlu sivisutigisumik taama pissanerlugit. 

Nuuk Outdoor meeqqanik nakkutiginnittuutiinnarniarpisiuk?

- Ilaanni aappimik naamimilluunniit akiuminaattarpoq. Oqaatigereerpara, meeqqat 15-it maanna taakkunannga nakkutigineqartut pillugit aaqqiissutinik pitsaalluinnartunik naammassiniagaqarpugut. Meeqqanik paaqqutarinninnermik ilinniarsimasunik suleqateqarluta suliniutit ataasiakkaat, taakku suleqatigalugit, pitsaanerulersinniarlugit suliniuteqarpugut, oqarpoq. 

Inunnimmi isumaginninnermik Aqutsisoqarfiup ulloq unnuarlu angerlarsimaffinngornissamik suliffeqarfiup qinnuteqaataa itigartissappagu, taava qanoq iliussavisi?

Akisinnaanngilakkit. Kisianni suliffeqarfik ulloq unnuarlu angerlarsimaffittut akuerineqanngippat, piumasaqaatit naammannginnerat pillugu, soorunami meeqqanik inissiiffigiuminaassaaq, Severin Berg oqarpoq. 

Sooruna erseqqissumik apeqqut taanna erseqqissumik akisinnaanngiliuk?

- Ilami suliniummut atatillugu akuerineqanngitsut suli ullumikkut suli suleqatigigatsigit. Akuerineqanngippata inissiiffigiuminaassaqaat, oqarpoq.

Nunarsuarmi  aalajangiinerit taanna pitsaanersarisuuppassuk, Nuuk Outdoorimut meeraq ataasinnguarluunniit inississimanavianngikkaluarparput, Severin Berg oqarpoq.