Ilulissani Eqqumiitsulianut Katersugaasivik eqqumiitsuliortunit tatigineerukkaluartoq inatsisit malinneqarsimapput
Ilulissani Eqqumiitsulianut Katersugaasivik ulluni makkunani uparuartorneqalaavissorpoq. Uperuartuinerit eqqumiitsuliortut arlallit suliamik, saqqummersitsinermi Backbone’imik taasami ulluni makkunani pisumi, ilaatinneqarnerannik ilisimatinneqarsimannginnerminnut uparuaaneraat.
Saqqummersitsineq kalaallit arnat eqqumiitsuliortutut suliaannik eqqumiitsuliamikkullu oqaatigiumasaannik nersorinninniarneruvoq. Arnat 26-t ukiuni 24-ni kingullerni suliarisartagaasa ilaat saqqummersitsinermi takuneqarsinnaapput.
Eqqumiitsuliortut maannamut arfineq-marluk, KNR-imit oqaloqatigisatta, saqqummersitsinermut suliamik ilaatinnissaat pillugu ilisimatinneqarsimannginnertik, arnanik eqqumiitsuliortunik nersorinninniarluni saqqummersitsinermut assortuuttuusoq oqaatigaat. Kattuffik KIMIK taamaattumik Ilulissani Eqqumiitsulianut Katersugaasivimmik tatiginnissinnaajunnaarnerminik aamma nalunaarpoq.
Saqqummersitsisoqassatillugu nalinginnaasuuvoq, eqqumiitsuliortut saqqummersitsinerup ammaanersiorneqarneranut atatillugu qaaqqusissummik imaluunniit suliaasa ilaatinneqarfigisaannik saqqummersitsisoqalernera pillugu ilisimatitsissummik nassiussivigisarnerat. Malene Vest Hansen, Københavnip Universitetiani eqqumiitsuliornerup oqaluttuassartaanik ilisimatusarfimmi - Institut for Kunst- og Kulturvidenskab-imi – ilinniartitsisuusoq taama oqarpoq.
Taamaakkaluartoq eqqumiitsuliortut katersugaasivimmi sulisut eqqumiitsuliortut arlallit suliaasa ataatsikkut saqqummersinneqarnerannut suleqataatinneqarneq ajorput, aamma nassuiaavoq.
- Nunarsuarmi saqqummersitsinissanut atatillugu eqqumiitsuliortut – suliaannik tuneriigaannik ilaqartitaqassagaluaraanniluunniit - nalinginnaasumik akuersissummik piniarfineqarneq ajorput.
- Eqqumiitsuliaq tunereeraanni, pisisup, pisiani qanorluunniit pisinnaavaa, Malene Vest Hansen, ullutsinni eqqumiitsulioriaatsimik aamma saqqummersitsinermi qulequtarisaq sammisarluunniit tunngavigalugu eqqumiitsulianik toqqartuinissamik ilisimatusartoq erseqqissaavoq.
Qaaqqusissut inissaminiissimassagaluartoq
Taamalli erseqqissaagaluarluni Malene Vest Hansen oqarpoq, Ilulissani Eqqumiitsulianut Katersugaasiviup ammaanersiornermut atatillugu eqqumiitsuliortunik qaaqqusisimannginnera qaqutigoortuusoq. Tassami nammineq takusimanngisaannarpaa.
- Ammaanersiornermut atatillugu ilasseqatigiissitsinermulluunniit qaaqqusineq nalinginnaanerusoq pissusissamisoornerullunilu, ilisimatusartoq oqarpoq.
Eqqumiitsuliortut, KNR-imit oqaloqatigineqartut tamarmik, suliamik saqqummersitsinermut ilaatinneqarnerat pillugu – saqqummersitsineq aallartimmat marsip ulluisa 28-anni aatsaat paasisaqarput.
Eqqumiitsuliortut marluk katersugaasivimmut suliaminnik tunisaqanngisaannarsimapput, suliarinikuusamillu arlaat sorliit saqqummersitami ilaatinneqarnersut sianiginaguluunniit. Eqqumiitsuliortut sisamat katersugaasiviup pisortaanut Andreas Hoffmannimut suliaminnik ukiualuit matuma siornagut tunisaqarnikuusimapput.
Eqqumiitsuliortut KIMIK-llu saqqummersitsineq sioqqullugu katersugaasivimmit ilisimatinneqarsimannginnerminnik uparuaapput – pingaartumik eqqarsaatigalugu qulequtaqartinneqarmat arlalillu suliaannik ataatsimut saqqummersitsinerummat.
Inatsimmit illersugaasoq
Inatsisilli misissoraanni, Ilulissani Eqqumiitsulianut Katersugaasiviup eqqumiitsuliortut ilisimateqqaanngikkaluarlugit saqqummersitsisinnaanera ajoriffissaqartinneqanngilaq. Assilialiorlutik eqqumiitsuliortartut Kattuffianni Danmarkimi - Billedkunstnernes Forbund i Danmark – allaffimmi pisortaq, Klaus Pedersen taama oqarpoq.
- Suliat tunigaanni naatsorsuutigineqariissaaq suliap tamanut takusassineqarsinnaanera. Taamaaliornissaq malittarisassaniinngilaq, Klaus Pedersen, inatsisilerituutut aamma ilinniarsimasoq oqarpoq.
Eqqumiitsuliortoq katersugaasivimmut eqqumiitsuliaminik tunisaqarsimanngikkaluarpalluunniit saqqummersitsinermi suliaanik ilaatitsinissaq aporfissartaqanngilaq.
Eqqumiitsuliortulli piginneqqaartussaanerat, suliaminnut suli akisussaaffeqarsinnaatitsivoq. Kisianni aatsaat tamanna atuutissaaq suliaa assilillugu suliaqartoqarnerani, Klaus Pedersen oqarpoq, nangillunilu:
- Piginneqqaartussaatitaaneq eqqumiitsuliaq, soorlu TV-mi, atuakkami atuagassianiluunniit atorneqarpat aatsaat isumaqarnerpaanngortarpoq – eqqumiitsuliamik sanasoq ilisimatinneqartussaammat. Kisianni katersugaasivinni assigisaanniluunniit takutitsineq inerteqqutaanngilaq, oqarpoq.
Klaus Pedersenip oqarnera naapertorlugu, eqqumiitsuliortut arlallit suliaat ataatsikkut saqqummersitsissutigissatillugit – eqqumiitsuliortut ataasiakkaarlugit ilisimatinniarlugit attavigisariaqanngitsut pisariaqanngilaq – naak, taamaaliorneq ileqqorissaarnerussagaluartoq.
Inatsisinili atuuttuni eqqumiitsuliortoq ilisimateqqaarnagu suliaanik ilaatitsinissamik Ilulissani Eqqumiitsulianut Katersugaasiviup aalajangersimanera unioqqutitsinertut taaneqarsinnaanngilaq. Klaus Pedersen erseqqissaavoq.