Eqqumiitsulianik katersugaasivik aalajangiusimaannartoq: Eqqumiitsuliat akerleriiffiusut nivingatiinnarneqassapput

Ilulissani Eqqumiitsulianik Katersugaasiviup eqqumiitsuliortup akuersissuteqannginneranni eqqumiitsuliaannik saqqummersitsinera oqallitsitsissutaangaatsiarpoq. Eqqumiitsuliortut eqqumiitsulianik peersitseqqunerisa kingorna aamma nivingatiinnarneqarput. Eqqumiitsuliortut arlallit saqqummersitsineq tupaatigisimallu aamma tamanna tupigalugulu ileqqorluttuliornerusoraat.

Saqqummersitsinermi aaqqissuussisoq, tassa Ilulissani Eqqumiitsulianik Katersugaasivimmi aqutsisoq, Andreas Hoffmann ilannguppoq.

Taassuma saqqummersitsineq sioqqullugu pisoq uggoraa. Tullianimut pitsaanerusoqassaaq:

- Eqqumiitsuliortut peqataasut tamarmik saqqummersitsinissap allagarsiunneqarnerani eqqaaneqarput. Tamatuma kingorna saqqummersitsineq sioqqullugu eqqumiitsuliortut ilaat saaffiginnipput. Attaveqaqatigiinnerli pitsaanerusinnaagaluarpoq.

Pingaartumik eqqumiitsuliat tassunga atatillugu ajorsartuulertussaanerat pissutigalugu, Andreas Hoffmann isumaqarpoq. Taamaammat pingaarnerit qitiulernissaat pissutigalugu pitsaanerulissapput.

- Taamaalilluni eqqumiitsuliat saqqummersitsinermilu oqallinneq tassunga taarsiullugu ukkatarineqassalluni, taanna oqarpoq.

Eqqumiitsuliortut isornartorsiuisuinnaanngitsut

Ilulissani Eqqumiitsulianik Katersugaasivik eqqumiitsuliortunut attaveqarnermini toqqaannarnerusinnaagaluartoq Andreas Hoffmannip nassuerutigaa.

- Isornartorsiuineq tusarnaarparput, tusagassiuutitigullu oqallinneq ilikkagaqarfigalutigu. Taamaammat eqqumiitsulianik katersugaasivimmi attaveqaqatigiinnitsinni pitsaanerulersitsiniarnissaq sulissutigissavarput, taanna oqarpoq, nangillunilu:

- Kisianni oqarnittut isornartorsiuinerit tusarnaarpagut, eqqumiitsuliortut ilaat soqutiginngitsuusaarneqartutut misiginerat uggornarpoq. Siunissami assingusumik pisoqaqqinnginnissaa soorunami kissaatigaarput.

Katersugaasivimmili aqutsisup eqqumiitsuliortut– akuersissuteqarlutik akuersissuteqaratilluunniit saqqummersinneqartut tamarmiullutik – saqqummersitsinermut isornartorsiuinngitsut erseqqissaatigaa:

- Aamma oqaatigissavara amerlasuunik pitsaasunik oqaaseqarfigineqarnerput nuannaarutigigatsigu. Takusaasuniinnaanngitsoq, aammali eqqumiitsuliortunit peqataasunit. Taamaammat eqqumiitsuliortut tamarmiullutik saqqummersitsinermut naammagittaalliunngillat.

Aammattaaq saqqummersitsineq arnat eqqumiitsuliornermi eqqartugaannginnerusarnerannik sammisaqarnissaq siunertaanerat pillugu naammagisimaannginnermik oqariartuuteqartoqarpoq. Taakkumi tusaaneqarneq ajorput. Taamaattorli katersugaasiviup aqutsisuata eqqumiitsuliortut isornartorsiuinerat tusaanianngilai.

Eqqumiitsuliat uninngatiinnarneqassasut

Eqqumiitsuliortut kattuffiata KIMIK-up Ilulissani Eqqumiitsulianik Katersugaasiviup suliamik isumaginninnera kingullertut isornartorsiorpaa:

Tamanna Andreas Hoffmannip aamma uggoraa:

- Soorunami uggornarpoq. Kisianni KIMIK-up eqqumiitsulianik katersugaasivik attaviginngilaa. Taakkuli tusagassiuutit aqqutigalugit isornartorsiuiniarlutik aalajangerput. Oqaloqatigiinnissaq nuannaarutigingaatsiassagaluarparput.

Taamaakkaluartorli Andreas Hoffmann aalajangiusimavoq. Taassuma eqqumiitsuliat nivingatiinnarniarpai. Allaat eqqumiitsuliat eqqumiitsuliortuinit peeqquneqaraluartut:

- Eqqumiitsulianut allamut tunineqarsimasunut tunngatillugu inatsit erseqqilluinnarpoq. Piginnittoq takutitsinissamut pisinnaatitaaffeqarpoq, piumasaminillu saqqummersitsisinnaalluni. Soorunami ataqqinnittumik.