KNR-ip ulluni makkunani meeqqanut Kommuneqarfik Sermersuumit inissinneqarsimasunut pissutsit oqaluttuarai.

Ilaat illoqarfiit pingaarnersaannit kangerluup qinnguani nunaqarfimmut Kapisilinnut umiatsiamik ingerlanneqartarput, tassanilu illuaqqani meeqqerisunit paarineqarnatik najugaqarput.

Aaqqiinermik ingerlatsisuuvoq takornariartitsinermik ingerlatalik Nuuk Outdoor. Naallu utaqqiisaasumik aaqqiinerugaluartoq meeqqat ilaat illuaqqani mikisuni oqorsarneqanngitsuni qaammatini 10-nngulersuni najugaqarput. Nunaqarfiullu inui arlallit meeqqat isertermatali aserorterinernik, tillinniarnernik, ikittaatit gas-issaannik naamaarnermik aamma ikuallatsitsinernik oqaluttuarput.

Aammalu kommunip borgmesteriata Avaaraq S. Olsen-ip (IA) Nuuk Outdoor pillugu ajornartorsiutit qaammatini arlalinni ilisimasaqarfigisimai:

- Aasaq ataatsimiititaliat marluulluta Kapisilinnukarpugut. Illuaqqanik piginnittut inuillu arlaqaqisut naapippavut suliniummik uuminnga isumakuluuteqartut, oqarpoq nangillunilu:

- Soorunami kamaatigeqaarput pissutsillu isoreqalugit. Taavalu qulaajaaneq annertooq aallartisippara, kommunalbestyrelsip tamarmiusup tapersersugaa.

Inuiaqatigiinni ajornartorsiut annertoqisoq

Avaaraq S. Olsenip erseqqissarpaa ajornartorsiut annertoqimmat pingaaqisoq aaqqinnissaanut nukippassuarnik atuisoqartariaqartoq:

- Nalunngilarput inuiaqatigiittut annertuumik ajornartorsiuteqarluta. Isumaqarpugut meeqqat inissinneqarsimasut amerlavallaartut. Misissorusoqaarput ilaqutariit nukittorsassallugit qanoq iliussanerluta. Aamma ulloq unnuarlu paaqqinniffinnut qanoq piumasaqassanerluta, oqarpoq. 

Kisianni Nuuk Outdoor ulloq unnuarlu paaqqinniffiunngilaq. Suliffeqarfiuvoq takornarianik sullissisoq, ukiorlu manna maajimiit suliaqarnini annertusisimallugu Kapisilinnilu meeqqat inissinneqartut paarilernerisigut. Maajimi piginneqatigiiffik takornarianik sullissisumik piginnittumit taassumannga pilersinneqarpoq. Ukiunilu 10-ni inuusuttut naleqqussarsimanngitsut paarisarsimavai, ippassaq KNR-imut oqarpoq. 

Kisianni Nuuk Outdoor paaqqinniffiunngilaq. Taamaattumillu suliniuteqarneq nakkutigineqanngilaq. KNR-illu borgmesteri tamatuminnga eqqasimmani imminut naqqipallappoq:

- Kommunalbestyrelsitut isumaqatigiippugut, meeqqanut inissivigisatsinnut piumasaqassalluta, oqarpoq nangillunilu:

- Tassami angalanerput tunngavigalugu manna aallarnerparput. Aaqqikkusukkatsigu.

Ilutigalugu Avaaraq S. Olsen oqarpoq, meeqqanik inissinneqartunik kangerlummut qamungarsuaq angallassisarneq – ilaquttat ikinngutillu qimallugit - taamatinneqassasoq:

- Aamma isumaqatiginngilarput meeqqat nuutinneqassasut kangerluullu qinnguanut toqqorlugit. Isumaqarpugut illoqarfimmiikkunik inuiaqatigiinnullu ilaallutik pitsaanerussasoq.

Massakkorpiaq aaqqiissutissaqanngilaq

Taamalu isumaqaruit aasarlu nammineq nunaqarfimmiunik oqaloqateqarsimallutit – taava sooq massakkut decembarimi suli Nuuk Outdoorimi meeraqarpa?

- Tamanna akisinnaanngilara.

Kisianni sooq qanoq iliuuseqartoqarsimanngila? Tassami illit politikikkut pingaarnermik akisussaasuuvutit – ingerlavissamik aalajangiisinnaallutit– sooq-una Nuuk Outdoor unitsinneqanngitsoq?

- Oqaatigeriikkattut pisut ataasiakkaat oqaaseqarfiginnaanngilakka. Suliffeqarfik ataaseq pillugu oqaaseqarnianngilanga. Kisianni ajornartorsiutit taakku aallaavigalugit aalajangerpugut politikikkut oqallisiginiarlugit. Taannalu massakkut ingerlapparput.

Suliamillu taassuminnga ingerlatsinerup massakkut qaammatit arfinillit anguai. Qanoq sivisutigisumik suli ingerlassangatippiuk? Meeqqammi suli taqqamaniipput.

- Kommunalbestyrelsimi neriorsoqatigiippugut ukiup affaa tullinnguuttoq atussallugu paasiniaanermut politikikkut sumut sammisumik qanoq ingerlaqqissanerluta. Ukioq tulleq tassunga atussavarput, oqarpoq.