Kalaallisut taaguuteqanngitsorpassuit suliarineqarnissaannik oqaatsinik ilisimasallit marluk kaammattuipput

Kalaallit oqaasiisa Namminersorlutik Oqartussat ingerlatsineranni salliullutik inissinnissaat Naalakkersuisoqatigiilersut anguniagaannut ilaanera oqaatsinik ilisimasallip nuannaarutigivaa. Kisiannili naammasseqqaarniagassarpassuaqartoq erseqqissaassutigivaa.

Kalaallisut taaguuteqanngitsorpassuit suliarineqartariaqartut oqaatigivaa. Allaffissornermi taaguutit, aningaasanut taaguutit, inatsisinullu taaguutit assersuutigai.

- Kiisami! Oqaatsinik ilisimasalik Carl Christian Olsen taama oqarpoq.

Iliuusissanik erseqqissunik saqqummiussisoqartariaqarpoq

Namminersorneq pillugu inatsisimmi kalaallit oqaasii pingaarnersaasut allassimavoq.

Tamannalu timitalerniarlugu maanna naalakkersuisuusut anguniagaqarmata, Carl Christian Olsenip nuannaarutigivaa. Suliassaqaqisorli aamma oqarpoq:

- Taamaattumik kinguneqartumik naammassiniassagaanni taava qanoq iliuusissanik erseqqissunik saqqummiussisoqartariaqarpoq. Carl Christian Olsen taama oqarpoq.

Kalaallisut taaguuteqanngitsorpassuit amigaataasut oqaatsinik ilisimasalinnit suliarineqarnissaat kissaatigineqarpoq

Namminersorlutik Oqartussat oqartussaasutut sullissisutullu atuuffippassuaqarput. Assersuutigalugu aningaasaqarnermut tunngasunik suliarpassuaqarput. Taamaattorli aningaasaqarnermut tunngasuni kalaallisut taaguutit amigartut Carl Christian Olsenip oqaatigivai.

- Kalaallit oqaasiisa atuuffiisa ilaat suli naammassinngillat. Assersuutigalugu allaffimmiutut ilinniartartut, aningaaserinermut ilinniartartut allallu, aammalu ilaatigut inatsisilerinermi ilinniartartut, taakkua taaguutaat suli suliarineqanngillat. Taakku atuuttussanngortinnissaat taavalu suliarineqarnissaat pingaarpoq. Carl Christian Olsen taama oqarpoq.

AAMMA ATUARUK Naalakkersuisoqatigiilersut oqaatsit pillugit isumaqatigiissutertik assigiinngitsumik isumaqarfigigaat 

Taanna Ilisimatusarfimmi oqalutsinngorniat nutserisunngorniallu ilinniarfianni ilinniartitsisumit taperserneqarpoq.

- Taaguutit ullutsinnut naleqquttut suli amigaatigaagut. Ilinniartitsisoq phd-itullu naammassisimasoq Arnaq Grove taama oqarpoq.

Taassuma napparsimmavimmi taaguutit qanoq amigaataatigineri assersuutigai.

- Napparsimavimmi oqaluttaassagaanni nutserisuussagaannilu, tamakkorpassuit suli amigaataapput. Napparsimasut nappaataat, inuup timaata taaguutai, inuup erlaviisa taaguutai.

- Soorlu aamma Namminersorlutik Oqartussani qullersat sulilissagunik tamakkorpassuit amigaatigissavaat. Taama Arnaq Grove naggasiivoq.

Ilinniartitsinerup qallunaatut ingerlanneqartarnera ilaatigut aamma pissutaaqataalluni kalaallisut taaguuterpassuit amigaatigineqartut, Carl Christian Olsen oqarpoq.

- Aammalu taakkua atuartitsissutiginissaat. Soorlu assersuutigalugu allaffimmiut qallunaatuinnaq ilinniartarput. Taakkua amigaatigisagut erseqqissumik suliaqarfigineqartariarput kalaallit oqaasii tamakkiisumik atorsinnaanngortinnissaannut.

Oqaatsit pillugit isumaqasioqatigiinnissami suliaqarfinni oqaatsinik inerisaanissaq pillugu oqallittoqarnissaa kissaatigineqarpoq

Naalakkersuisut oqaatsit pillugit ukioq manna isumasioqatigiinnissamut pilersaaruteqarput. Tamanna Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup uppernarsarpaa. Qaquguli tamanna piumaarnersoq suli aalajangerneqanngitsoq naalakkersuisoqarfimmit oqaatigineqarpoq. Carl Christian Olsenillu suliaqarfinni oqaatsinik inerisaaneq isumasioqatigiinnissami aamma oqallisaajumaartoq neriuutigivaa.

- Tamakkuninnga qalluinermut atortariaqarparput taassuma ataatsimeersuarnissap nalaani. Carl Christian Olsen taama naggasiivoq.