Naalakkersuisoqatigiilersut oqaatsit pillugit isumaqatigiissutertik assigiinngitsumik isumaqarfigigaat 

Kalaallit oqaasii Namminersorlutik Oqartussat ingerlatsineranni salliullutik inissisimassasut, Inuit Ataqatigiit Siumullu naalakkersuisoqatigiinnissamik isumaqatigiissutiminni naammassiniagaasa ilagaat. 

Kisianni partiit taakkua immikkoortillugit aperigaanni, assigiinngitsunik naammassiniagaqarput.

Inuit Ataqatigiit Namminersorlutik Oqartussani pisortat tullersortaallu kalaallisut oqalussinnaasuunissaannik timitaleerusuttut, Siumut kalaallisut oqaasillit amerlanerpaat sulisorineqarnissaannik anguniagaqarput.

Kalaallit oqaasii Namminersorlutik Oqartussat ingerlatsineranni salliullutik inissisimassapput.

Inuit Ataqatigiit Siumullu apriilip sisamaanni Naalakkersuisoqatigiilernerminni sulinissaminnut tunngaviusumik isumaqatigiissutaanni taama allaqqasoqarpoq.

Partiilli suleqatigiilersut suleqatigiissutigisassaminnik taama oqaasertaliigamik sunarpiaq anguniarpaat?

Inuit Ataqatigiit: Aqutsisut kalaallisut oqalullik

Naalakkersuisoqatigiit kalaallit oqaasiisa Namminersorneq pillugu inatsisip atuutilerneratigut nunatsinni pingaarnersaanerat timitalerniarlugu, allaffissornikkut ingerlatsinermi najoqqutarineqarnissaa Inuit Ataqatigiinniit anguniaritsik, inatsisartunut ilaasortap Mariia Simonsenip oqaatigivaa.

- Atorfinitsitsisarnermut kaajallaasitaqarpoq ukiuni tallimani pisoqaassusilimmi. Tassani piumasarineqarpoq pisortat tullersortaallu ajornanngippat kalaallisut oqaaseqassasut kalaallillu kulturiannik ilisimasaqassasut. Aalajangersakkap taassuma kaajallaasitamiittup timitalerniarnissaa Naalakkersuisunit suliarineqarniarpoq.

Siumut: Tamarmik kalaallisut oqalulerlik

Siumulli allamik anguniagaqarpoq.

- Nunatsinnut naleqquttumik aaqqissuusseqqittariaqarpugut, kalaallisut oqaasillit amerlanerpaat sulisorineqarnissaat qulakkeerniarlugu.

Siumut oqaaseqartartuat Doris J. Jensen taama oqarpoq, nangipporlu: 

- Qallunaatuinnaq imaluunniit tuluttuinnaq oqaasillit imaluunniit allatut, taakkua kasiinngikkaluarlugit kisianni aamma periarfissiisariaqarpugut pitsaanerusumik taakkua kalaallisut oqaluttalernissaannut. 

Imalu itisiliivoq: 

- Soorlu assersuutigiinnarlugu Naalakkersuisuugallarninni siunniunnikuuarput inuit tamarmik kalaallisut oqaluttalernissaat. Taanna suliaq unittoornikoq aamma aallarteqqinneqartariaqarpoq.

Naalakkersuisoqatigiilersut Inuit Ataqatigiit Siumullu inatsisartunut 2025-mi qinersinissap tungaanut Naalakkersuisoqatiinnissartik apriilip sisamaanni isumaqatigiissutigaat.