Zelenskyj: Putinip Ukraine Moskvami saassussinermut pisuutinniarsaraa
Ruslandip præsidentiata Vladimir Putinip Ruslandip illoqarfiisa pingaarnersaata Moskvap eqqaani peqqarniisaarniat tallimanngornermi saassussinerat Ukrainemut tutsinniarsaraa.
Ukrainep præsidentia Volodymyr Zelenskij taama isumaqarpoq. Nutaarsiassaqartitsivik AFP taama allaaserisaqarpoq.
- Moskvami pisut erseqqilluinnarput: Putin inupalaallu allat allanik pisuutitsiniarsaripput, Zelenskij oqarpoq.
Moskvap eqqaani tusarnaartitsisarfik tallimanngornermi unnukkut saassunneqarpoq.
Inuit 137-nit ikinnerunngitsut saassussinermi toqutaasut, amerlanerusullu ikilerneqartut russit misissuisartuisa ullumi ilisimatitsissutigaat.
Inuit saassussinermut toqqaannartumik attuumassusillit tigusarineqarsimasut, Putinip tv-kkut aallakaatinneqartukkut oqalugiarnermi oqaatigaa, inuillu katillugit aqqanillit tigusarineqarsimasut oqaatigaa.
Moskvap eqqaani saassussisut saassussinnginnerup siorna Ukrainemit Ruslandimut angalasut Ruslandimi oqartussat oqaatigaat.
Saassussereernermilu kingorna Ukrainemut qimaariaraluartut Putinip oqalugiarnermini oqaatigaa.
Islamisk Statimeersut saassussisuunerarput
Putinip Ukraine Moskvami saassussinermut pisuutinniarsarigaa Ukrainep præsidentiata Zelenskij-p oqaatigereerpaa.
Islamisiortut ingasaassiniat Islamisk Stat tallimanngornermi unnukkut saassussisuunerarput. Saassussisoqareernerata kingorna nammineq taama nalunaaruteqarput.
Naallu Putinip saassussinermut atatillugu Ukraine arlaleriarluni taagaluaraa, Ruslandimi oqartussat kikkut saassussisuunersut suli oqaatiginngilaat.
/ritzau/
