Moskvami saassussisuunerarneqartut tamarmik tigusarineqartut
Ruslandip illoqarfiis pingaarnersaanni Moskvami ippassaq pisut aallarniutigissavagut, tusarnaartitsisarfiimmi ilaat saassunneqarpoq, saassussisutullu pasineqartut tamarmik tigusarineqarsimapput.
Ruslandip præsidentia Vladimir Putin tv-kkut aallakaatinneqartukkut Ruslandimi innuttaasunut ullumi arfininngornermi oqalugiarami taama oqarpoq. Nutaarsiassaqartitsivik Reuters, Ruslandimilu naalagaaffiup nutaarsiassaqartitsivia Tass taama allaaserisaqarput.
- Naakkittaatsumik peqqarniisaarniartoqarnerani oqalugiarfigaassi, inuimmi sussuseqanngitsorpassuit toqutaapput, meeqqat, inuusuttut arnallu, Putin oqartoq Tassip allaaseraa.
Illoqarfiit pingaarsaasa Moskvap eqqaani Krasnogorskimi tusarnaartitsisarfimmi Crocus City Hallimi tallimanngornermi unnukkut saassussisoqarpoq.
Inuit kinaassusersineqarsimanngitsut tusarnaartitsisarfissuarmut inunnik ulikkaartumut iserput inuillu tungaannut eqqaassilerlutik.
Tusarnaartitsisarfissuarmi marloriarluni qaartoqarpallanneranik taassuma saniatigut nalunaaruteqartoqarpoq, tusarnaartitsisarfissuarmilu aamma ikuallattoqalerluni.
Inuit 133-t saassussinermi toqutaasut nutaarsiassaqartitsiviup AP-p allaaseraa.
Saassussisuunerarneqartut sisamat allat tigusarineqartut
Putinip oqarnera naapertorlugu saassussisut akornanni toqqaannartumik peqataasut sisamat tigusarineqarsimapput. Inuit aqqanillit taamaasillutik maannamut tigusarineqarsimapput.
Peqqarniisaarniat islamisiortut Islamisk Statimeersut saassusisuunerarput.
Taamatut saassussisoqarnera pissutaalluni Ruslandimi marsip ulluisa 24-anni aliasunneqarnissaa Putinip nalunaarutigaa.
/ritzau/