Yellowknife-imi pinerluttarnerit amerlapput

Canadap illoqarfiisa ilaanni, Yellowknifemi, diamantinik, uuliamik gassimillu piiaanerup innuttaasut aningaasarissaartippaat.

Taamaattorli 2005-imi nalunaarusiami atuarneqarsinnaavoq illoqarfimmi tassani pinerlunniartarnerit pinngitsuuisinnaajunnaarnerillu amerliartortut, CBC News taama allaatiginnippoq.

Yellowknifemi inuit angerlarsimaffeqanngitsut nalunaarusiornermi annerusumik apersorneqarsimasut, isumaqarput, Yellowknifemiut nunap sinneranut naleqqiullutik tallimariaammik pinerlunniarnerusartut. Nalunaarusiaq 250.000 koruuninik nalilik siornali naammassivoq, nalunaarusiarlu qanittukkut aatsaat tamanut saqqummiunneqartoq, CBC News allaatiginnippoq.

- Pinerlunniartarnerit aaqqiissuteqarfiginiarlugit, qanorlu aaqqiissuteqarsinnaanerluta, isumassarsiorfigisinnaasatsinnik nalunaarusiortitsivugut, Yellowknifemi borgmesteri, Van Tighen, oqallittoqarnissaanik kissaateqartoq, taama oqarpoq.

Imerniartarfinni killilersuisoqarnissaa, katsorsartittarfiillu aningaasanik taperneqartarnissaat, nalunaarusiami innersuussutigineqarpoq. 16-it inorlugit ukiullit killilimmik aneersinnaatitaalernissaat nalunaarusiamittaaq siunnersuutigineqarpoq.