Vittus: Islandimi sinniisoqarfiliornissaq Danmarkimik isornartorsiuinerunngilaq

Nunatta namminerisamik Islandimi sinniisoqarfeqalernissaanik Naalakkersuisut kissaateqarnerat danskit nunanut allanut tunngasunut ministereqarfiata Polar Nanumut tunngatillugu suliami ingerlatsineranik isornartorsiuinertut paasineqassanngilaq.

- Danskit nunanut allanut ministereqarfiata Innuttaasunik sullissivia suliamut matumunnga allamulluunniit tunngatillugu isornartorsiorneqanngilaq, nunanut allanut naalakkersuisoq, Vittus Qujaukitsoq, KNR-imut malikkut taama allappoq.

Danskit nunanut allanut ministereqarfiata Innuttaasunik sullissiviani pisortap, René Dinesenip, Polar Nanumut suliamut tunngatillugu danskit oqartussaasuisa ikiuinerannik Naalakkersuisut isornartorsiuineraraluarpai. 

Nunatta Reykjavikkimi sinniisoqarfissaanik pilersitsinissamik Naalakkersuisut aalajangiiffigisassatut siunnersuutaata ilaa atuareerlugu taama oqarpoq. 

Tassani atuarneqarsinnaavoq danskit oqartussaasuisa Polar Nanumut suliamut tunngatillugu 'innuttaasut kalaallit sullinneqarnerat, oqalutseqartinnissaat Nunatsinnilu qanigisaminnut attaveqarnissaat' naammassisinnaasimanngikkaat’.

Vittus: Kalaallisut oqaluttunut sianerfissaqartariaqarpoq

Tunngavilersuutigineqartorli danskit tungaannit iliuuserineqartunik isornartorsiuinertut paasineqarani ikiuinerup annertusinissaanik pisariaqartitsinermik pissuteqarpoq, Vittus Qujaukitsoq taama isumaqarpoq.

Kilisaammi Polar Nanumi inuttat marluk islandimiut politiivinit januaarip qaammataani tigusarineqarmata, danskit nunanut allanut tunngasunut ministereqarfia, assersuutigalugu qanigisanut, nunarsuaq tamakkerlugu ulloq unnuarlu sullissiviatigoortumik taamaallaat ikiuivoq. Sullissivilli taanna danskisuinnaq tuluttuinnarlu attaveqarfigineqarsinnaavoq.

- Pisumi matumani nalilerneqarpoq sullissineq pineqartoq Nunatsinni qanigisanut kalaallisut oqaatsitik atorlugit sullinneqarnissaminnik pisariaqartitsisunut naammaginanngitsoq, Vittus Qujaukitsoq KNR-imut taama oqarpoq.

Taamaammat Nunanut allanut pisortaqarfik Nuummiittoq januaarip 19-ianit 24-anut oqarasuaammik sianerfissamik pilersitsivoq, inuillu 20-t sinnerlugit kalaallisut danskisulli tassuuna ikiorneqarlutik. Tamannalu Namminersorlutik Oqartussat Reykjavikkimi sinniisoqarfimmik pilersitsinissamik kissaateqarneranut pissutaasut ilagaat.

Vittus Qujaukitsup erseqqissaatigaa Islandimi pisumut atatillugu Namminersorlutik Oqartussat danskillu oqartussaasui suleqatigiilluartut. Innuttaasulli kalaallit nunamilu allami oqartussat akornanni attaveqaqatigiinneq siunissami pitsaanerusinnaasoq.

- Kalaalerpassuarnut sunniuteqartumik Islandimi siunissami arlaatigut pisoqassagaluarpat, islandimiut danskillu oqartussaasuisa annertunerusumik ikiorserneqarsinnaanerat Nunatta Islandimi sinniisoqarfeqalerneratigut qulakkeerneqarsinnaavoq, Qujaukitsoq KNR-imut taama allappoq.

Island Nuummi sinniisoqarfimmik 2013-imi pilersitsivoq.