Vittus Islandimi nunatta sinniisoqarfianik pilersitserusuttoq
Nittartakkamut Sermitsiaq.AG-mut taama oqarpoq.
Nunatta Islandillu attaveqarnerat ukiuni kingullerni annertusiartuinnarpoq, aamma nunatsinneersunik Reykjavikkimi diplomateqalernera aningaasarsiornikkut politikkikkullu iluaqutissartaqassaaq, Vittus Qujaukitsoq taama isumaqarpoq.
Arnap islandimiup toqutaaneranut atatillugu kilisaammi Polar Nanumi inuttat Reykjavikkimi politiinit tigummigallarneqarnerisa kingorna taama oqarpoq.
Islandimi sinniisoqarfiliornissaq pillugu saqqummiussissummi Vittus Qujaukitsoq allappoq kalaallit islandimiullu oqartussaasuisa qanittumik attaveqarnissaat pisariaqartoq paasinarsisoq, danskit oqartussaasuisa sumiginnaassimanerat pissutigalugu:
- Danmarkimi nunanut allanut ministereqarfiup innuttaasunut sullissinera Danmarkillu Reykjavikimi aallartitaqarfia kalaallit innuttaasut kiffartuunneqarneranni suliassamik kivitsisinnaasimanngillat; ilaatigut nutserisoqarnermut Kalaallillu Nunaanni ilaqutaasunut attaveqarnermi. Qitiusumik suliassat ikittuinnaat suliap uumap ingerlanerani Danmarkimi oqartussaasunit suliarineqarsimapput, Vittus Qujaukitsoq taama allappoq.
Nunanut allanut pisortaqarfiup naatsorsuineri malillugit Islandimi sinniisoqarfik ukiumut 2,5 millionit koruuninik aningaasartuuteqarfiusassaaq.
