Nunanut allanut ministereqarfiup isornartorsiorneqarnini ilumuunnginneraraa

- Taamatut nassuiaasoqarnera ilisarisinnaanngilara. Nunanut allanut ministereqarfiup Innuttaasunik kiffartuussiviata Københavnimiittup Nunanut allanut pisortaqarfik Nummiittoq suliami matumani qanittumik attaveqarfigalugulu suleqatigilluarpaa.

Nunanut allanut ministereqarfiup Innuttaasunik kiffartuussiviani pisortaq, René Dinesen, KNR-imut taama oqarpoq.

Nunanut allanut naalakkersuisup Vittus Qujaukitsup nunatta Reykjavikkimi sinniisoqarfittaarnissaanik kissaateqarnera nittartakkap Sermitsiaq.AG-ip pingasunngormat allaaseraa.

Sinniisoqarfimmik pilersitsinissamut tunngavilersuutitut saqqummiussissummi Nunatta Islandillu akornanni politikkikkut aningaasarsiornikkullu attaveqarnerup annertusiartornerata saniatigut, danskit oqartussaasuisa Islandimi "innuttaasunut kalaallinut tunngatillugu suliassamik kivitsisinnaasimannginnerat" allaaseraa.

Qujaukitsup Birna pillugu suliamut atatillugu Polar Nanumi inuttat kalaallit marluk tigusaanerannut suliaq allakkamini innersuussutigaa.

Immikkut ilisimasalik Islandiliartinneqarpoq

Saqqummiussissutillu oqaasertai Sermitsiaq.AG-mit saqqummiunneqartut atuareerlugit René Dinesenip tupaallaatigalugillu paasiuminaatsippai. Nunanut allanut ministereqarfiup suliami ikiuineranik isornartorsiuinertut erseqqilluinnartutut isigaa.

- Nunanut allanut ministereqarfiup Innuttaasunik kiffartuussivia kalaallinut pineqartunut marlunnut konsuuleqarfitsigoortumik ikiuinera danskisut innuttaassuseqartunut tamanut  tunniunneqartartup assingilluinnarpaa.

Nunanut allanut ministereqarfiup Innuttaasunik kiffartuussiviata Nunanullu allanut pisortaqarfiup Nuummiittup attaveqaqatigiinnerat suliap ingerlanerani pitsaasuullunilu qanittumik ingerlasimasoq, Dinesenip ilisimatitsissutigaa. Nunanut allanut pisortaqarfik kalaallit inuttat politiinit tigusarineqarnerata kingorna ullualuit ingerlareermata KNR-imut aamma taama paasissutissiivoq.

Danskit oqartussaasui danskisut innuttaassusillit nunani allani politiinit tigusarineqarnerinut sulianut allanut naleqqiullugu aamma annertunerusumik iliuuseqarsimasut, Dinesenip erseqqissaatigaa.

- Matumani suliaq - nalunngisatsitut pileqqaarmat Kalaallit Nunaanni Islandimilu alaatsinaanneqartupilussuuvoq - taamaammat Danmarkip Reykjavikkimi aallartitaqarfia konsuuleqarfitsigoortumik ikiuinissaa annertusarparput immikkut ilisimasalimmik Københavnimit Islandiliartitsilluta, taannalu parnaarussaasunut tunngatillugu immikkut ilisimasaliuvoq.

Immikkut ilisimasallip suliassaraa kalaallit tigusarineqartut marluusut eqqartuussissuserisumik illersuisoqarsinnaatitaanerisa peqqinnissakkullu ikiorserneqarsinnaatitaanerisa atuutsinneqarnissaat qulakkiissallugu. Oqartussalli nunat allaneersut politiit suliaannut atatillugu inatsisitigut akuliussinnaatitaanngillat.

Oqalutseqartitsinissaq paatsiveerussutaasoq

Kilisaammi inuttat tigusarineqarnerisa kingorna ulluni tulliuttuni oqaatigineqarpoq oqalutsissaqartinneqanngitsut. Tamanna ullualuit qaangiummata aatsaat pisoq kilisaataatileqatigiiffiup Polar Seafoodip siornatigut ilisimatitsissutigaa.

Sermitsiaq.AG naapertorlugu, danskit oqartussaasuisa oqalutseqartitsinissamik ikiuisinnaasimannginnerat Qujaukitsup saqqummiussissutitut allakkiamini uparuarpaa.

Tamannalu eqqortoq, René Dinesenip oqaatigaa, - danskillu oqartussaasuisa tamanna nunani allani suliassarinngikkaat aamma oqaatigalugu.

- Danmarkimi innuttaasoq imaluunniit Kalaallit Nunaanni innuttaasoq nunami allami politiinit tigusarineqarpat, taava nunami pineqartumi politiit inatsisinillu atortitsinermut oqartussat oqalutseqartitsinissaq isumagisassaraat. Spaniami innuttaasoq Danmarkimi politiinit tigusarineqarpat, taava danskit politiivisa akisussaaffigaat pineqartup oqalutseqartinnissaa.

Politiillu oqalutsissaqartitsinngippata, taava sulisitsisup, matumani Polar Seafoodip, imaluunniit eqqartuussissuserisup illersuisuusup oqalutseqartitsisoqarnissaa kimigiiserutigisariaqassavaat.

Nunanut allanut ministereqarfiup Innuttaasunik kiffartuussiviata ilisimatitsissutigaa kalaaleq Islandimi tigummigallarneqartoq danskit Reykjavikkimi aallartitaqarfianit suli pulaarneqartartoq.