Birnamut tunngatillugu pasisaq pingitsuutinneqartoq
Angutip illersuisua Unnstein Örn Elvarsson Sermitsiaq.AG-mut oqarpoq tallimanngormat nalunaarfigineqarsimalluni pasilliut kingulleq suliariniarunnaaraat.
Islandimi politiit qaammat ataaseq qaangiuttoq aalajangerput angut iperarniarlugu, sulili pasilliuteqarlutik.
Nassuiaatigineqarpoq passilliuteqarnikkut angut illersugaasinnaasoq, politiimmi arlaatigut peqquteqarlutik suliaq pillugu ilannguteqqikkaluarpanni illersuisoqarnissaminut taamaalilluni periarfissaqalermat.
Maannali tassa inatsiseqarnikkut pasilliinermut tunngasoq kingulleq angummit inuusuttumit peerneqarpoq.
Angulli kalaaleq inuusuttoq alla kisinngoruppoq. Sapaatip akunnerata siuliani toqutsisimanermut pasilliut allanngorlugu toqutsisimasutut hashimillu 20 kilomik anngiortumik eqqussisimasutut nutaamik unnerluutigineqarpoq.
Taassuma parnaarussaanera sapaatit akunnerinik marlunnik sivitsorneqarpoq. Islandimi qaqugu eqqartuunneqassanersoq suli aalajangerneqanngitsoq Sermitsiaq.AG allappoq.
