Workshoppertitsineq Inuit Saamillu inuusuttut atortussaannik tapersiissasoq

Aggustip naanerani suliniut inuusuttorpassuarnik Nuummi ataatsimoortitsisussaq ulluni pingasuni Inuit Saamillu inuusuttut akornanni ataqatigiissitsillunilu nukittunerusumik suleqatigiissitsissaaq.

Suliniut Naapitta - Let’s Meet! workshoppertitsinikkut, katersugaasivinnut takornariartitsinikkut kulturinillu avitseqatigiinnikkut inuiaat marluk, immaqa ilimagisaminninngaanniit assigiissuteqangaatsiartut, akornanni ataqatigiilersitsissaaq.

NAPA-mi suliniutinut ataqatigiissaarisup pisussamillu aaqqissueqataasup, Maannguaq Rosingip, tamanna oqaatigaa:

- Pingaarutilimmik peqatigiinnermik pilersitserusuppugut. Kalaallit Saamillu assigiiffeqarpassuaqarput, taamaammat aamma neriuutigaarput peqatigiinnerit taakku pilersinneqartussat siunissami periarfissarpassuarnik ammaassiumaartut, taanna oqarpoq.

Inuiaqatigiinni sammisat tarrajunnersat eqqartorneqassapput

Inuianni taakkunani marlunni inuiaqatigiinni sammisat tarrajunnersat pingaartumik ataatsimoortitsipput. Ataatsimoornerup nalaani sammisat taakku aamma eqqartorneqarluarnissaat neriuutigalugu Maannguaq Rosing oqarpoq:

- Kalaallit kulturitsinni saamillu kulturianni aamma inooriaasitsinni assigiiffeqaqaagut. Tamattami nunap inoqqaarivaatigut. Pisinnaatitaaffivut soorunami oqaluuseralugillu aallutissavagut. Naapitta - Let’s Meet!-imi taakku ingerlakkumaarlutigit neriuutigaarput.

Inuiaallu taakkua marluk akornamminni assigiissuteqangaatsiarnerat iluaqutissatut pilersinneqassaaq, taamaasilluni inuiaat taakkua atugassarititaat annertuumik allannguivigineqarsinnaalissapput.

Taamaammat inuiannut taakkununnga marlunnut sammisat nanertuutaasinnaasut eqqartorneqassapput, aammattaarli inuusuttut taakku suliniutaat iluatsikkumallugit siunnersuisoqarlunilu workshoppertitsisoqassaaq, Maannguaq Rosing oqaluttuarpoq:

- Assersuutigalugu nunap inoqqaavisa pisinnaatitaaffii, inuit atugaat unamminartut silallu pissussaa eqqartussavagut. Suliniutinilli aqutsinermi aamma ilitsersuisoqassaaq. Taamaammat neriuppugut suliniutit peqatigiinnerillu pilersinneqartussat sammisanut aalajangersimasunut tunngassuteqarumaartut.

Suliniut aggustimi ingerlanneqartussaq siunissami suleqatigiinnerpassuarnut aallarniutaassasoq Maannguaq Rosingip neriuutigaa:

- Suleqatigiinnerput attanneqarnissaa inuusuttullu Nuummukartussat misilittakkanik avitseqatigiumaartassagivut neriuutigaara, taanna oqarpoq.