WHO-p abekoppit nunarsuarmi peqqissutsikkut ajornartoorfiusutut nalunaarutigigaa

Abekoppinik tunillatsinnissap aarlerinassusaa nunarsuaq tamaat isigalugu ingasanngitsoq, Europamili qaffasissoq, WHO-p qullersaa oqarpoq.
Abekoppit tuniluunnerat nunarsuarmi peqqissutsikkut ajornartoorfiusutut nalunaarutigineqassanersut WHO-p suleqatigiivisa immikkut ilisimasallit akornanni isumaqatigiinngitsoqartoq suliniaqatigiiffiup qullersaa, Tedros Ghebreyesus tusagassiortunut arfininngornermi katersortitaminut oqarpoq. Assi © : Johanna Geron/Reuters/Ritzau Scanpix
Allattoq Ritzau
juulip 23-at 2022 16:00
Nutserisoq Ivik Kristiansen

Naalagaaffiit Peqatigiit peqqissuunissaq pillugu suliniaqatigiiffiata WHO-p abekoppit tuniluunnerat nunarsuarmi peqqissutsikkut ajornartoorfiusutut nalunaarutigigaa, Reuters allappoq.

Nalunaarut taanna suliniaqatigiiffiup aarlerisaarutaani qaffasinnerpaavoq.

Abekoppit tuniluunnerat nunarsuarmi peqqissutsikkut ajornartoorfiusutut nalunaarutigineqassanersut WHO-p suleqatigiivisa immikkut ilisimasallit akornanni isumaqatigiinngitsoqartoq suliniaqatigiiffiup qullersaa, Tedros Ghebreyesus tusagassiortunut arfininngornermi katersortitaminut oqarpoq.

WHO-p qullersaata isumaa nalunaaruteqarnissamut aalajangiisuusoq, taanna nassuiaavoq.

AAMMA ATUARUK Nakorsaaneqarfik: Abekoppit ernumassutiginagit

Abekoppinik tunillatsinnissap aarlerinisaasusaa nunarsuaq tamaat isigalugu ingasanngitsoq, Europamili qaffasissoq, taanna oqarpoq.

Tunillanneqarsimasutut maannamut nalunaarutigineqartut nunanit 71-init 14.000-init amerlanerupput. WHO naapertorlugu inuit tallimat nappaat toqqutigereerpaat.

Maanna atortut nappaalanerup pakkersimaarneqarnissaanut periarfissaqarluartitsisut, WHO-p qullersaa naliliivoq.

AAMMA ATUARUK WHO-p abekoppemut akiuussusersuinissaq pisariaqarsorinngikkaa

Danmarkimi tunillanneqarsimasutut nalunaarsorneqarsimasut 51-iupput. Siulleq maajip ulluisa 23-anni nalunaarsorneqarpoq.

WHO peqqissutsikkut ajornartoornermik ukiut marluk sinnilaarlugit aappassaanik nalunaaruteqarpoq. Coronavirusi Kinap avataani 2020-mi jannuaarip naanerani tuniluutilermat, siullermik nalunaaruteqarpoq.