Nakorsaaneqarfik: Abekoppit ernumassutiginagit

Abekoppit ernumananngillat. Amerlanernut napparsimarululersitsineq ajorput, virusilu taanna timitta nammineq akiorsinnaalluarpaa. Nakorsaaneqarfimmit Paneeraq Noahsen oqarpoq.

- Timitta illersuutaata taanna nammineq sorsutarisinnaavaa. Virusiuvoq, taamaattumik nakorsartinnissaq pisariaqanngilaq, aamma peruluutaannginnami, Paneeraq Noahsen KNR-ip radiokkut aallakkaatittagaanut, Nunatta Nipaanut oqarpoq.

Abekoppit aapakaanit inunnut tuniluussimasut maannalu inummiit inummut tuniluuttut taassuma nassuiaatigaa.

AAMMA ATUARUK Danmarkimi abekoppemik tunillatsissimasoq siulleq paasineqartoq

Nunatsinni tunillatsissimasoqanngilaq. Danmarkimi tunillatsissimasoq siulleq maajip ulluisa 23-anni paasineqarpoq.

Paneeraq Noahsenilli tuniluuttoqarnissaanut aarlerinartoqarpallaanngitsoq nassuiaatigaa.

- Anersaartuutikkut aamma torlukkullu taakkuninnga kuppinik naasoqarsinnaavoq, taavalu qaaraangamik viruserpassuit aniatittarlugit. Taamaattumik aatsaat qanillivissorsimagaanni tunillatsittoqarsinnaavoq.

Abekoppit assersuutigalugu sinngup puuatigut assarutitigullu aamma tuniluussinnaasoq taassuma ilanngullugu oqaatigaa.

Tunillatsissimasoriguit imminut mattugit

Danmarkimi Peqqinnissamut aqutsisoqarfiup nappaat napparsimasutut misiginikkut, qiiarlernermik, kissarneqarnermik, niaqorlunnermik, nukinik anniarnermik qasunermillu allartikkajuttoq allappaa. Aammattaaq imerajuup sorujuiarneqartarfiini tinunermik ersittoqartarpoq.

AAMMA ATUARUK WHO-p abekoppemut akiuussusersuinissaq pisariaqarsorinngikkaa

Abekoppit timikkut qanillingaatsiarluni tuniluuttarmata tuniluutiasorujussuartut isigineqarneq ajortut aqutsisoqarfiup allappaa. Taamaattumik inuiaqatigiinni annertuumik tuniluuttoqarnissaa ilimananngitsorujussuusutut aqutsisoqarfik naliliivoq.

Nappaalli suli pinaveersaartinneqassaaq. Taamaammat inuit tunillatsissimasorisut qanoq iliussappat?

- Taava coronatulli imminut mattutissaatit, taavalu peqqinnissaqarfimmut oqarasuaatikkut saaffiginnillutit, taassuminnga tunillatsissimasinnaanerit ernumagalugu, taavalu suut malunniutaanersut aamma oqaluttuarilluarlugit, Paneeraq Noahsen Nunatta Nipaanut oqarpoq.