WHO-p abekoppemut akiuussusersuinissaq pisariaqarsorinngikkaa

Naalagaaffiit Peqatigiit peqqinnissakkut suleqatigiiffiata WHO-p abekoppep Afrikap avataani tuniluutilernerata kingunerisaanik akiuussusersuingaatsiartoqarnissaa pisariaqarsorinngilaa.

Nutaarsiassaqartitsivik Reuters taama allaaserisaqarpoq.

Eqquiluisaarneq atoqatigiinnermilu mianersoraanni nappaat siaruatsaalineqarsinnnaasoq, WHO-p Europami immikkoortortoqarfiani pisortaq Richard Pebody oqarpoq.

Taassuma akiuussutissat ikittuinnaasut aamma oqaatigaa.

Danmarkimi kuppernermut eqqaanartumut abekoppemut tunillatsissimasoq siulleq ataasinngornermi paasineqarpoq, taanna Spaniamut angalareerluni tunillatsissimavoq.

Abekoppemik tunillatsittoq alla marlunngornermi aamma paasineqarpoq.

Gran Canariamiissimasoq

Statens Serum Institutip (SSI) oqarnera naapertorlugu Europami inuit 83-it abekoppemik tunillatsissimasut paasineqarput. Taakkunannga 23-t Spaniami paasineqarput. SSI-p oqarnera naapertorlugu angut tunillatsissimasoq Danmarkimi paasineqartoq Gran Canariamiissimavoq.

Richard Pebodyp oqarnera naapertorlugu tunillatsissimasinnaasunik ujartuineq mattusimanerlu abekoppep tuniluutinnginnissaanut pakkersimaarutaapput. Virusilu taanna tuniluutiasuunngitsoq maannamullu sakkortuumik napparsimassutigineqarsimanngitsoq taassuma oqaatigaa.

AAMMA ATUARUK Danmarkimi abekoppemik tunillatsissimasoq siulleq paasineqartoq

- Tuniluunneq ima annertutiginngilaq innuttaasut akiuussusersortariaqarnissaannik, Richard Pebody WHO-meersoq Reutersimut oqarpoq.

Virusip sapaatini akunnerni ukunani qanoq tuniluunnera suli ilimaneqanngilaq. Ilisimatuut tuniluuttoqarneranik nutaanik misissuileruttorput, taakkulu virusi allannguuteqarsimanersoq paasiniarsaraat.

Suiaaqatinoortartunut qinngarinninneq immikkoortitsinerlu mianersoqqussutigigaat

Naalagaaffiit Peqatigiilli qullersaasa oqarnerat naapertorlugu virusi allanngorsimanerminik ersiuteqanngilaq.

Abekoppemik tunillatsissimasut amerlanerpaat angutaasarput angummik allamik atoqarteqarsimasut. Europami Nappaatinik Pinaveersaartitsinermut Nakkutiginninniarnermullu Suliaqarfik (ECDC) naapertorlugu virusi atoqatigiinnermi tuniluunneranut takussutissaqarpoq.

Spaniami abekoppep tuniluunnera Gran Ganariami Gay Pridemik aaqqissuussisoqarneranut atassuteqarnersoq misissorneqaleruttortoq tusagassiorfik NBC News allappoq.

Naalagaaffiit Peqatigiit sullissiviata Unaidsip hiv-imik aids-imillu akiuiniarnermik ataqatigiissaarisup suiaaqatinoortartunut qinngarsuinissaq immikkoortitsinissarlu mianersoqqussutigaa.

Abekoppemmi angutini angummik allamik atoqateqarsimasuni takussaanerusaraluartoq Unaidsip kikkulluunniit tunillatsissinnaasut erseqqissaatigaa.