Naalakkersuisut whistleblowerimik aaqqiissutaat atulerpoq
Taamaaliornikkut Namminersorlutik Oqartussat qitiusumik allaffeqarfianni ilaquttanik salliutitsisarnermik pinaveersaartitsinissaq ammanerusumillu ingerlatsinissaq qulakkeerniarneqarlutik.
Aaqqissuussinermi pineqartoq tassaalluni atorfillit qarasaasiakkut immikkut ittumik aaqqissuussakkut Aningaasaqarnermut Sulisorisanullu Aqutsisoqarfimmut kinaassusertik isertuullugu naammagittaalliuutiminnik imaluunniit pissusissamisoorsorinngisaminnik apuussisinnaanissaat.
Aamma atuaruk Isertuannginnerulernissamut atuagaq najoqqutassiaq saqqummerpoq
Naammagittaalliuutigineqartut pasilliutigineqartulluunniit tunngavissaqarpata Naalakkersuisoqarfiup pisortaanut ingerlateqqinneqassapput, taassumalu paasissutissat kinaassutsimik isertuussilluni saqqummiunneqartut misissuiffigineqarnissaat aallartissallugu pisussaaffigaa.
Paasissutissanik ingerlatitseqqittarneq periarfissanut atuutereersunut sulisut atorsinnaasaanut ilassutaavoq. Tamatumani ilaatigut pineqarlutik sulisut sinniisoqartarnerat imaluunniit isumannaallisaanermut suleqatigiinnermullu aaqqissuussinerit.
Aningaasaqarnermut aatsitassanullu Naalakkersuisup Andreas Uldumip paasissutissanik ingerlatitseqqittarnermik aaqqissuussineq Namminersorlutik Oqartussani ammanerusumik ingerlatsinissamut angisuumik alloriarnerunerarpaa. Tamatumunngali atatillugu oqaatigalugu Namminersorlutik Oqartussat qitiusumik allaffeqarfianni unioqqutitsisoqartarneranik pasilliutissaqannginnami.
Aamma atuaruk Naalakkersuisut peqquserluttoqartannginnissaanik pilersaarutaat erseqqarluttut