Naalakkersuisut peqquserluttoqartannginnissaanik pilersaarutaat erseqqarluttut
Siumup, Demokraatit aamma Atassutip naalakkersuisoqatigiinnissamut isumaqatigiissutaanni oqaatilliisartoqarnermik aaqqissuussinermik taaneqartartumik eqqussinissaq aamma inatsimmik iluanaarniarluni peqquserluttarnermik pinaveersaartitsisussamik inatsisiliortoqarniarpoq. Oqaatilliisartoqarnermik aaqqissuussinermi pisortani sulisut eqqunngitsuliortoqarneranik misigisaqartut, kinaassutsiminnik isertuussillutik avoqqaarineqarnissaminnillu ersissuteqaratik eqqunngitsuliarineqartunik nalunaarutiginniffigisinnaasaannik pilersitsisoqarniarpoq.
Transparency International Greenlandip siulittaasuata Anita Hofferip Naalakkersuisunit siunnersuutit taakku takoreerlugit nuannaarutigai.
- Taama pisoqartussanngornera nuannaarutigaarput, suliniutimmi taakku marluk ajunngilluinnarput, Anita Hoffer Atuagagdliutinut oqarpoq.
Taamaattorli Anita Hofferip aamma maluginiarpaa, Naalakkersuisunngortitsinermi isumaqatigiissutip kalaallisuua aamma qallunaatuunngortinneqarnera imminnut naapertuutinngitsut.
- Kalaallisuuani taamaallaat allassimavoq inatsisiliornikkut suliniuteqartoqassasoq, sunalu atuuttussaanersoq immikkuullarissumik oqaatigineqarani, Anita Hoffer aviisimut oqarpoq.
Naalakkersuisoqatigiinnissamut isumaqatigiissutip kalaallisuua atuuttussatut Siumumit, Demokraatinit Atassumillu isigineqarmat, partiit taakku oqaatilliisartoqarnermik peqquserluttannginnissamillu tunngasumik inatsisiliorniarnersut erseqqarinngilaq.