Isertuannginnerulernissamut atuagaq najoqqutassiaq saqqummerpoq

Pisortani atorfillit killiligaanatik isertuanatillu oqaaseqarsinnaanerat unamminartinneqarpoq, Transparency Greenlandimiit taama isumaqarput.

Taamaammat tamanna allanngortinniarlugu Transparency Greenland, atuakkamik najoqqutassamik ullumikkut marlunngornermi saqqummiussissapput. 

Pisortani sulisut suliffimminni atugaat pitsanngorsarniarlugit, tassa suliffimminni ajortumik unioqqutitsisumilluunniit ingerlasoqarpat inuttut pisinnaatitaaffitik atorlugu oqaaseqarsinnaalersinniarlugit, atuagaq tamakkununnga najoqqutassiivoq.

Naalakkersuisut nalunaaruteqarsinnaanermik aaqqissuussineq eqquutsinnissaanut utaqqinitsinni, Transparency Greenlandip atuagaq najoqqutassaq ullumikkut saqqummiussaa qupperarujoorsinnaavarput.

Sulisunut ikiorsiutaassaaq

Pisortani sulisut qaqugukkut akuerisamik suullu oqaatigisinnaanerlugit paasisinnaanngussavaat atuakkami pineqartut ilagaat.

Pisortani sulisut atukkaminnik nipituuliornerunissaat tassani anguniarneqarpoq.

Inuit suliffimminni atugarliortut saaffissaaleqisarnerat ajornartorsiutaagajuppoq.

Atuagarlu siunnersuutinik ilitsersuutinik pisortanilu sulisut killiligaanngitsumik oqaaseqarsinnaanerannut maleruagassanik imaqarpoq.

Tamannalu pisariaqartinneqarsimavoq, Transparency Greenlandimi siulersuisunut ilaasortaq, Thomas Trier oqarpoq.

-Isertuanngissuseq Kalaallit Nunaanni unamminartinneqartorujussuuvoq, Thomas Trier oqarpoq.

Pisortani sulisut oqaaseqarnissaminnut tunuarsimaartartut Transparency Greenlandimiit malugineqartarsimavoq.

Isertuannginnerulernissamut oqaaseqarnissamullu tunuarsimaarunnaarnissamut pisortat akisussaasuusut Thomas Trierip naqissuserpaa 

Aamma atuaruk Transparency Greenland: Inatsisissatut siunnersuut malinnaasinnaatitsinerulissaaq

Pisortat isumagisussaavaat sulisuni paatsuungassutigineqartut akunnattoorfiillu ammasumik oqaluuserineqartarnissaat, taamatullu paasissutissat pingaartut toqqorterneqannginnissaat anguneqassasoq, tamanna inunnut ajoqusiisinnaanera pinngitsoortinniarlugu. 

-Atuakkami malinneqanngitsut ilaannit sulisitsisoqarpat sulisunut ernumalersitsisoqarsinnaavoq nalornilersitsillunilu sumut saaffiginnissanerluni, suliffimmi pisortap orninnissaanut immaqa tunuarsimaarfigineqarmat, pisortallu annissuiffiginissaanut sapernusoqarsinnaavoq upperineqannginnissarlu ernummatinut ilaasarluni. Transparency Greenlandimiit Thomas Trier KNR-imut oqarpoq.

Atuagaq najoqqutassiaq Transparency Greenlandip nittartagaanut iserluni aaneqarsinnaavoq.

Atuagaq Katuami ullumi saqqummersinneqassaaq, kikkulluunniit killilersugaanngitsumik oqaaseqarsinnaatitaanermut oqallinermi peqataasinnaapput. Aaqqissuussarlu ualimut sisamanut qiteqquppat aallartissaaq.