Weinstein kannguttaatsuliorsimasutut unnerluutigineqaqqittoq

Harvey Weinstein New Yorkimi eqqartuunneqaleruttornermini kannguttaatsuliorsimanermut Los Angelesimi aamma unnerluutigineqarpoq.
Allattoq Ritzau
januaarip 07-at 2020 07:48

USA-mi filmiliortartumut Harvey Weinsteinimut New Yorkimi Manhattanimi eqqartuussineq ataasinngornermi aallartippoq. Tusagassiorfiit annertuumik malinnaaffigisaannik taanna taartunik atikkersorsimalluni pisunniutilerluni eqqartuussivimmut iserpoq. Eqqartuussivimmut apissinnissaanut inuit akerliusut silataani utarrerrapput.

Harvey Weinstein New Yorkimi eqqartuunneqaleruttornermini Los Angelesimi 2013-imi  pinngitsaaliilluni atoqateqarsimasutut kinguaassiutitigullu atornerluisimasutut suliani marlunni immikkoortuni aamma unnerluutigineqarpoq.

AAMMA ATUARUK Weinstein erklærer sig ikke skyldig i nye sexanklager

Unnerluussisoq naapertorlugu Harvey Weinsteinip arnaq Los Angelesimi akunnittarfimmi februaarip ulluisa 18-ianni pinngitsaalillugu atornerlussimavaa, aqaguanilu arnaq alla akunnittarfimmi allami kinguaasiutitigut atornerlussimallugu. Hollywoodimi filmiliortartutut ilisimaneqarluartoq Harvey Weinstein Hollywoodimi angutini ukiuni malittariiaani pissaneqarluartutut ilisimaneqartoq, maanna sulianut assigiinngitsunut sisamanut eqqartuussivimmut unnerluutigineqarpoq, sulilu allanik unnerluussisoqaratarsinnaalluni.

Arnammi arlaqartut maannamut filmiliortartoq sallutuutut naapertuilluanngitsuliorsimasutullu pisuutillugu saqqummikaapput. Kinguaassiutitigut kanngutsaatsuliorfigineqarsimasut 2017-imi #MeToo-mik taallugu saqqummeralermata filmiliortartoq siullermeerluni taamatut saqqummiunneqarpoq. 

Ukiuni kingullerni qaangiuttuni arnat 90-ingajaat filmiliortartoq kinguaassiutitigut kanngutsaatsuliorsimasutut, pinaasersumut arneriniarsimasutut atornerluisimasutullu nalunaarutigaat. Unnerluutiginnittut tusaamasaanerit ilagaat Angelina Jolie, Salma Hayek aamma Gwyneth Paltrow.