Volleyballimi GM nuunneqarpoq

Polar Volleyball Nuuk, PVN, Nunatsinni pissartanngorniunnernik porskikkunni aaqqissuisussaagaluarpoq. Inissarniarnerli ajornartorsiortaammat GM nuunneqarpoq.

- Ajoraluartumik GM Maniitsumut nuupparput. Taamaasiorpugut inissiaateqarfiit Iserit, INI A/S aamma Kommuneqarfik Sermersooq angusaqarfiunngitsumik oqaloqatigineqareersut. Taakku tamarmik unnuiffiusinnaasunik ikiorsinnaasimanngilaatigut, volleyballertartut kattuffianni siulittaasoq Ove Thomassen aamma PVN-mi siulittaasuusoq oqarpoq.

Unnuiffiusinnaasunik amigaateqarnermut pissutaavoq timersuutit arlariit porskikkunni Nuummi pissartanngorniutitsisussaanerat. Sisoraatinik oqilaniunnermi, U-16-it assammik arsarneranni aamma nerrivimmi arsaararnermi Nuummi pissartanngorniuttoqartussaavoq.

Atuarfik atorunnaartoq Qorsussuaq oqoqarnera pissutigalugu unnuiffiusinnaanngilaq tamannalu illoqarfimmi unnuiffiusinnaasunik killiliingaatsiarpoq timersortartut pissartanngorniunnerminni atuarfinni festsalinilu najugaqartarmata.

- Angalanissat pilersaarusiornissaat eqqarsaatigalugu marlunngormat aalajangerpugut pissartanngorniunnerit Maniitsumut nuunniarlugit tassanilu AVI aaqqissuisuusussanngorpoq, Ove Thomassen oqarpoq.

Volleyballimi GM ingerlanneqassaaq palmep sapaataani martsip 24-aniit sisamanngortoq illernartoq martsip 28-at ilanngullugu.

Siorna volleyballimi pissartanngorniunnermi AVI Maniitsumeersoq arnani angutinilu pissartanngorpoq.