Visit Greenlandimi pisortaaneq KNI-mi pisortanngortoq

Anders Stenbakken ukiuni arfineq-marlunni Visit Greenlandimi pisortaaneroreerluni aggustip aallaqaataani KNI-mi ussassaarinermut pisortanngussaaq. 

- KNI-p oqaluttuarisaanera imartoqaaq inuiaqatigiinnilu tunngaviusutigut suliaqarfia annertoorujussuulluni; tamatumalu oqaluttuanngortinneqarnissaa ussassaarutiginissaalu uannut suliassaavoq pissanganarluinnartoq, periarfissarpassuaqarlunilu unammilligassarpassuaqarfiusoq, Stenbakken tusagassiuutinut oqarpoq.

AAMMA ATUARUK Visit Greenland nutaamik pisortartaalersoq

Anders Stenbakkenip KNI-mi atorfininnera nuannaarutigineqarpoq.

- Anders Stenbakken-ip atorfinitsinneqarneratigut KNI nukittuumik piginnaasaqqortuumillu ussassaarinermut pisortaqalerpoq, KNI-p suliffeqarfittut ilisaritinneqarnissaanut tuniniaanerlu eqqarsaatigalugu pimoorusserpalaarnerusumik ingerlatsilernissaanik qulakkeerinnittussamik, Peter Grønvold Samuelsen KNI-mi pisortaaneq oqarpoq.

Anders Stenbakken ukiorpassuarni Nunatsinni najugaqarnikuuvoq, ilaatigut Tasiilami ukiuni 16-ni najugaqarnermini ilinniartitsisutut, sunngiffimmi sammisassaqartitsinermik suliaqarnikuulluni kiisalu Destination East Greenland pisortaanerunikuulluni.