Visit Greenland nutaamik pisortartaalersoq

Anders Stenbakkenip Visit Greenlandimi atorfini kingoraartissaminut aggustimi pisortatigoortumik qimalerpaa. Pisortaq tunuartussaq naapertorlugu angallassiviit nittarsaassinissaat Travel Mart Nuummi septembarimi pisussaammat nutaamik pisortartaarnissaq piffissatsialaavoq.

- Visit Greenlandimi pisortassap pitsaanerpaamik toqqammavissinnissaanut periarfissatsialaavoq, Stenbakken oqarpoq.

Ukiut arfineq marluk suliffigereerlugu ingerlaqqinnissaminut piffissanngortoq ilanngullugu oqaatigaa.

- Allamik misiliinissaq ajunngitsuuvoq. Nutaamik pisortaqalerneq suliffeqarfimmut allannguuteqartitsissammat aamma ajunngitsuuvoq, Stenbakken oqarpoq.

Taassuma suli naluaa siunissami sumi sulilerumaarnerluni.

- Soraaruma sussanerlunga naluara. Susoqarnissaa ilisimanagu matumik ammaarusuummiinnarpunga, Stenbakken oqarpoq.

- Kalaallit Nunaannut tunngasunik arlaatigut suliaqaannarnissara neriuutigaara, periarfissalli allat ammaffigaakka, Anders Stenbakken oqarpoq.

Siullermilli nuliaminut Jyllandip avannaani Skagenimi najugaqartumut angerlaqqaarallassalluni oqaatigaa.