Hans Egede malunnartinneqassanngitsoq: Sianiilliornerullunilu eqqortuliorneruvoq
Palasip danskinit norskinillu kingoqqisup, Hans Egedep, nunatsinnut Nuup avataatungaaniittumut Illuerunnernut tikeqqaarneraniit ukiut 300-t qaangiunnerat malunnartinneqassava?
Malunnartinneqassanngitsoq Kommuneqarfik Sermersooq isumaqarpoq.
Pisussamut pingaartorsiornissamut aningaasat 2,4 millionit siusinnerusukkut illikartinneqaraluarput.
AAMMA ATUARUK Hans Egedep nunatsinnut ukiut 300-t matuma siorna tikinnera Nuummi malunnartinneqanngiinnassasoq
Taakkulu aningaasat Nuup tunngavilerneqarneraniit ukiut 300-t qaangiuppata 2028-imi atorneqassasut, Kommuneqarfik Sermersooq aalajangerpoq.
Taamatullu aalajangerneq Ane Sofie Nielsenimit nuannaarutigineqarpallaanngilaq. Taassumami Hans Egedep upperisamik eqqussisimanera qujaniutigerusuppaa:
- Pingaarutilimmik anguniagaqarluni, angusaqarluni taama nuannertigisoq. Suna tamarmi nunarput taama annertutigisoq siaruarfigivaa. Sunaluunniit anguniagaq inerittulik pingaartupilorujussuuvoq, kinguliinut. Taamaattumik uanga borgmestererput isumaqatigisinnaanngilara, taanna oqarpoq.
AAMMA ATUARUK Peqatigiiffik nutaaq: Nunatta ukiut 300-t matuma siorna nunasiarineqarsimanera oqallisigissavarput
Inuusuttunnguullu Seqininnguaq Poulsenip isumaa allaavoq. Taanna ilinniarnertuunngorniarpoq peqatigiiffimmilu Nalik Kalaallit Nunaanni ilaalluni.
- Nuannaarutigeqaara, isumaqarpungalu tassa eqqortumik aalajangersimasut. Ilami pissutsit allanngornikuugamik. Massakkullu kulturerput kinaassutserpullu pingaartinnerugatsigu.
Seqininnguaq Poulsen Ane Sofie Nielsenilu isumai assigiinngikkaluaqisut aporaassutigineqanngillat:
- Assigiinngitsunik isumaqaraluaruttaluunniit ataqqissavagut, Ane Sofie Nielsen oqarpoq.
Taakku oqallinnerat uani takujuk.
