Løkke aamma Kielsen: Suleqatigiinnerput paarilluassavarput
Christiansborgimi ministeriunerup allaffeqarfiani sisamanngornermi naalakkersuisut siulittaasui ataatsimeeqatigiipput. Tassani isumaqatigiipput suleqatigiinneq pillugu ataatsimut oqaaseqaateqarniarlutik, naak qaammatini kingullerni Kalaallit Nunaata
Danmarkillu akornanni pissutsit tamalaarsimagaluartut.
- Isumaqatigiissutigaarput danskit kalaallillu Naalakkersuisuisa akornanni suleqatigiinneq naliginnaasumik ajunngitsumik ataqqeqatigiilluni kinguneqartussamillu ingerlanneqarmat nunanut marlunnut iluaqutaasussamik. Tamanna illersorlugulu nukittorsarusupparput ataatsimeeqatigiinnermik kingorna siulittaasut taama ataatsimut nalunaaruteqarput.
Naalagaaffeqatigiinneq unammillerneqaleraluarpoq nunanut allanut tunngasunut naalakkersuisoq Vittus Qujaukitsoq 2016-ip naalernerani oqaaseqarmat Danmarkip Kalaallit Nunaannut akimaniakujunnera tamanut aserorterutaasoq.
AAMMA ATUARUK Kim Kielsenip Vittus Qujaukitsoq suli tatigigaa
Kim Kielsen aamma Lars Løkke ataatsimeeqatigeereeramik oqaaseqarput nunat marluk qanittumik suleqatigiissasut imminnullu ilanngutitittarlutik.
- Suliat ataasiakkaat isumaqatigiinngissutigisarpavut. Tassanili aamma isumaqatigiippugut qanittumik tatigeqatigiillutalu ataatsimut aaqqiisarniarluta, siulittaasut oqarput.
Tamatumunnga aqqutissaavoq Danmarkip Kalaallit Nunaatalu paasissutissanik paarlaasseqatigiittarnissaat imminnullu peqataatittarnissaat.
- Isumaqatigiippugut naalakkersuisutigut ataqatigiissaaqqissaarinikkut suliat oqimaatsut aaqqiivigisarniarlugit, nunanut allanut attaveqarfigut ilanngullugit.
Kim Kielsen Danmarkimiippoq Kalaallit Nunaata sinniisoqarfiani sisamanngornermi ukiortaami ilassinninnissamut atasumik.
