Lars Løkke: Isornartorsiuineq Kielsenimeerpat aatsaat ernumanissamut pissutissaqalissaanga
Nunanut allanut naalakkersuisup Vittus Qujaukitsup aviisimi Politikenimi marlunngornermi saqqummersumi apersorneqarnermini Danmarkimik isornartorsiuinera ministeriunerup qanoq isumaqarfigineraa marlunngornermi ualikkut apeqqutigineqarpoq.
Qujaukitsup apersorneqarnermi ilaatigut oqaatigaa Kalaallit Nunaata pingaartitai pillugit Danmarkip inissisimanera nunat taakku marluusut atassuteqarnerannut ajoqutaasoq:
- Anneruniarnera naalagaaffeqatigiinni atassuteqarnitsinnut aserorsaataalluinnarpoq, ilaatigut taama oqarpoq.
Ministeriunerup Lars Løkke Rasmussenip isornartorsiuineq marlunngornermi ualikkut oqaaseqarfigaa. Tamanna Folketingimi oqallittoqareersoq tusagassiortunik katersortitsinermi pivoq.
- Naalakkersuisut siulittaasuannik Kim Kielsenimik oqaloqateqartarninnut tunngatillugu isornartorsiuineq taama ittoq ilisarisinnaanngilara, kisianni oqaatigisai soorunami naalaarpakka, taamaammat aamma Kim Kielsen naapeqqikkukku tamatuma oqaloqatigiissutiginissaa inissaminiissaaq. Akulikitsumik naapittaratta qanittukkut tamanna pissaaq.
- Isumaqarpunga pitsaasumik tatigeqatigiinnerlu tunngavigalugit suleqatigiittugut, aamma siunissami taamaattoqaannarnissaa kissaatigaara.
AAMMA ATUARUK Danmarkip anneruniarnera aserorsaataalluinnarpoq
Danskit naalakkersuisuisa nunatta USA-mut tunngatillugu soqutigisai pingaarnerutinnerunngippatigit amerikamiut nunatsinnit anisitaasinnaasut Qujaukitsup apersorneqarnermini sioorasaarutigaa. Taamatullu sioorasaarisoqarnera ministeriunerup aallaqqaammut eqqissisimasumik tiguaa.
- Naalakkersuisut siulittaasuannit, pitsaasumik suleqatigisannit, taama isornartorsiuisoqarneranik tusagaqanngilanga. Isumaqarpunga nunanut allanut politikkikkut suleqatigiinneq uatsinnut, kalaallinut naalagaaffeqatigiinnermullu pingaartuusoq.
- Naalakkersuisut siulittaasuata oqaatsit taama ittut atorlugit danskit naalakkersuisui isornartorsioraluarpagit aatsaat ernumalissagaluarpunga. Oqaatigineqaannartutut tiguakka, aammalu kinguneqartussatut isiginagit, aamma soorunami Kim Kielsen naapeqqikkukku tamanna pillugu oqaloqatigissavara, ministeriuneq oqarpoq.
